ઈન્દોરના અક્ષય કાંતિ બમ સામે ધરપકડ વોરંટ

છેલ્લી ઘડીએ પોતાના પક્ષ સાથે ગદ્દારી કરનાર ઈન્દોરના અક્ષય કાંતિ બમ સામે ધરપકડ વોરંટ જાહેર થયું છે. કોંગ્રેસે અક્ષય બમને ઈન્દોરથી લોકસભાના ઉમેદવાર બનાવ્યા હતા. એપ્રિલના છેલ્લા સપ્તાહમાં આ જૂના કેસમાં બમ વિરુદ્ધ કલમ 307માં અચાનક વધારો કરવામાં આવ્યો હતો. આ પછી, નાટકીય ઘટનાક્રમ સાથે બમે કોંગ્રેસમાંથી પોતાનું નામ પાછું ખેંચ્યું અને ભાજપમાં જોડાયા હતા.
આ સમગ્ર ઘટના બાદ આ કેસની પ્રથમ સુનાવણી 10 મેના રોજ નક્કી કરવામાં આવી હતી. જેમાં અક્ષયે વકીલ મારફતે પારિવારિક કાર્યક્રમ હોવાથી અને પિતાએ બિમારીમાં બેડ રેસ્ટને ટાંકીને હાજર નહીં રહેવાને કારણે માફી માગી હતી. કોર્ટે અરજી ફગાવી દીધી હતી. 8મી જુલાઈ સુધીમાં બંનેની ધરપકડ કરીને કોર્ટમાં રજૂ કરવા માટેનો આદેશ આપવામાં આવ્યો છે. ઉલ્લેખનીય છે કે આજની મુદ્દતમાં ગેરહાજર રહેલા અક્ષય મંત્રી કૈલાશ વિજયવર્ગીય સાથે કાર્યક્રમોમાં દેખાયા હતા.
ફરિયાદીના વકીલ મુકેશ દેવલે કહ્યું કે 2007માં નોંધાયેલા રમખાણ, મારામારીના કેસમાં ગયા મહિને કોર્ટના આદેશ પર કલમ ​​307 વધારવામાં આવી હતી. તેની સુનાવણી 10 મેના રોજ થઈ હતી. શરૂઆતમાં ફરિયાદી પક્ષે યુનુસ પટેલ દ્વારા અરજી રજૂ કરવામાં આવી હતી. તેમાં કહેવામાં આવ્યું છે કે આ કેસમાં અક્ષય અને તેના પિતા સામે ગંભીર કલમો ઉમેરવામાં આવી છે, તેથી તેમના જામીન રદ કરવા જોઈએ.
બીજી તરફ આરોપી અક્ષયના વકીલે અરજીમાં એવી રજૂઆત કરી હતી કે અક્ષય આજે પારિવારિક અને સામાજિક કાર્યક્રમોમાં વ્યસ્ત છે. મુદ્દતમાં હાજરીમાંથી મુક્તિ આપવા વિનંતી કરી હતી. તેમના પિતા કાંતિએ બિમારીના કારણે બેડ રેસ્ટમાં હોવાથી હાજરીમાંથી મુક્તિ માટે અરજી કરી હતી. એડવોકેટ દેવલે જણાવ્યું હતું કે દલીલો સાંભળ્યા બાદ કોર્ટે બંને વિરુદ્ધ ધરપકડ વોરંટ જારી કર્યું છે.