ગુજરાતભરમાં છેલ્લા 10 દિવસથી મહત્તમ તાપમાનનો પારો સતત વધતો રહ્યો છે. શુક્રવારે 1.1 ડિગ્રીના ઘટાડા સાથે અમદાવાદમાં 45.5 ડિગ્રી તાપમાન નોંધાયું. 46.6 ડિગ્રી સાથે દાહોદ રાજ્યનો સૌથી ગરમ જિલ્લો રહ્યો. જે જિલ્લામાં રેડ એલર્ટ જાહેર કરાયું હતું તે જિલ્લામાં આજે ઓરેન્જ એલર્ટ રહેશે. હવે આગામી બે દિવસ રાજ્યમાં તાપમાનનું જોર એકાદ ડિગ્રી ઘટે તેવી શક્યતા છે ત્યાર બાદ ત્રીજા દિવસથી મહત્તમ તાપમાનમાં બેથી ત્રણ ડિગ્રીનો ઘટાડો થઈ શકે છે. એટલે ગુજરાતવાસીઓને ગરમીથી આંશિક રાહત મળે તેવી શક્યતાઓ છે.
હજુ પણ આગામી ત્રણ દિવસ દરમિયાન સૌરાષ્ટ્રના ભાવનગર, કચ્છ, બોટાદ, સુરેન્દ્રનગર, દીવ, મધ્ય ગુજરાતમાં છોટાઉદેપુર અને વડોદરા શહેરમાં હીટવેવની અસર રહેશે. ગુજરાતના હવામાન વિભાગ દ્વારા અગાઉથી જ મે મહિનાના છેલ્લા સપ્તાહમા અંગ દઝાડતી ગરમીની આગાહી વ્યક્ત કરવામાં આવી હતી. જેને પગલે હાલમાં ગુજરાત રાજ્ય અગનભઠ્ઠી બન્યું છે અને ગુજરાતવાસીઓ ભઠ્ઠીમાં શેકાઇ રહ્યા હોય તેવી સ્થિતિ જોવા મળી રહી છે. તેમાં પણ ખાસ કરીને અમદાવાદ અને ગાંધીનગર શહેરમાં હવામાન વિભાગ દ્વારા રેડ એલર્ટ જાહેર કરવામાં આવ્યું છે.
ગરમીમાં મળશે આશિંક રાહત : તાપમાન એક ડિગ્રી ઘટે તેવી શક્યતા
આગામી ત્રણ દિવસ ભાવનગર, કચ્છ, બોટાદ, સુરેન્દ્રનગર, દીવમાં હીટવેવ
