ઉત્તર સિક્કિમમાં બુધવારે રાત્રે 220 મીમીથી વધુ વરસાદ અને તિસ્તામાં પૂરને કારણે 1200 થી વધુ સ્થાનિક અને વિદેશી પ્રવાસીઓ સિક્કિમમાં ફસાયેલા છે. વરસાદના કારણે અનેક વિસ્તારોમાં ભૂસ્ખલન થયું છે. તિસ્તા નદીમાં પાણીનું સ્તર ઝડપથી વધ્યું અને કિનારાના ઘરોમાં પાણી ઘૂસી ગયા હતા. હવામાનમાં સુધારો થતાં પ્રવાસીઓને બહાર કાઢવાની પ્રક્રિયા શરૂ થશે. રસ્તાના સમારકામમાં પાંચથી છ દિવસનો સમય લાગી શકે છે. ઉત્તર સિક્કિમમાં શુક્રવારે પણ વરસાદ ચાલુ રહ્યો હતો. આ દુર્ઘટનામાં મૃત્યુઆંક છ પર પહોંચ્યો છે. ગુરુવારે ત્રણ લોકોના મૃતદેહ મળી આવ્યા હતા. ત્રણ લોકો ગુમ થયા હતા. શુક્રવારે વધુ ત્રણ મૃતદેહો મળ્યા બાદ ગુમ થયેલા લોકોના મૃત્યુની પણ પુષ્ટિ કરવામાં આવી હતી.
સાંકલાંગ વિસ્તારમાં પુલ ધોવાઈ જવાને કારણે ચુંગથાંગ અને લાચુંગ વિસ્તારનો વાહનવ્યવહાર થંભી ગયો છે. મુખ્યમંત્રી પ્રેમ સિંહ તમાંગે શુક્રવારે આપત્તિની સ્થિતિની સમીક્ષા કરવા બેઠક બોલાવી હતી. તેમણે અસરગ્રસ્ત વિસ્તારોમાં સ્થિતિ વિશે સંપૂર્ણ માહિતી એકઠી કરીને રાહત અને બચાવ કાર્યને ઝડપી બનાવવાનો નિર્દેશ આપ્યો હતો. સિક્કિમના મુખ્ય સચિવ વિજય ભૂષણ પાઠકે કહ્યું કે કેન્દ્ર સરકાર સાથે ફસાયેલા પ્રવાસીઓને હવાઈ માર્ગે બહાર કાઢવા માટે વાતચીત શરૂ કરવામાં આવી છે. આ હવામાનની અનુકૂળતા પર નિર્ભર રહેશે. વૈકલ્પિક રીતે રસ્તા દ્વારા સ્થળાંતર કરવાનું આયોજન કરવામાં આવ્યું છે અને 5-7 દિવસમાં કનેક્ટિવિટી પુનઃસ્થાપિત થવાની અપેક્ષા છે.
