સૌરાષ્ટ્રમાં સર્વત્ર શ્રીકાર વર્ષા : દક્ષિણમાં જામ્યો મેઘો

જૂનાગઢમાં મેઘરાજા મન મુકીને વરસ્યા છે. જૂનાગઢના ગીરનાર પર્વત પર 8થી 10 ઈંચ વરસાદ પડ્યો છે. ગીરનાર પર્વત પર ભારે વરસાદને કારણે ભવનાથ વિસ્તારમાં પાણીની નદીઓ વહી હતી. જુનાગઢથી ભવનાથના રસ્તા ઉપર પાણી ભરાયા હતા. ભારે વરસાદને કારણે શહેરનો વિલીંગ્ડન ડેમ અને દામોદર કુંડ ઓવરફ્લો થયો છે
જૂનાગઢનો વિલીંગ્ડન ડેમ ઓવરફ્લો થયો છે, ગીરનાર અને દાતાર પર્વત પર ધોધમાર વરસાદથી ડેમમાં આવક થઇ છે. પ્રથમ વરસાદમાં જ વિલીંગ્ડન ડેમ ઓવરફ્લો થતાં જૂનાગઢવાસીઓની પાણીની સમસ્યાનો અંત આવ્યો. ડેમ એક ફૂટની સપાટીથી ઓવરફ્લો થયો છે. ડેમમાં હજુ પણ પાણીની આવકમાં સતત વધારો થઈ રહ્યો છે. ડેમ ઓવરફ્લો થતાં જૂનાગઢના મધ્યમાંથી પસાર થતી કાળવા નદીમાં ઘોડાપૂર આવ્યું છે.મોટી સંખ્યામાં લોકો ડેમ પર નજારો માણવા પહોંચ્યા છે
સૌરાષ્ટ્રમાં સપાટો બોલાવ્યાં બાદ આજે વહેલી સવારથી જ દક્ષિણ ગુજરાતમાં મેઘરાજા જમાવટ બોલાવી રહ્યા છે. નવસારી, વલસાડ, ઉમરગામમાં ધોધમાર વરસાદ વરસી રહ્યો છે. જેને પગલે રોડ રસ્તા પર પાણી ભરાઈ ગયા હતા. મરોલી અને સચિન રેલવે સ્ટેશનની વચ્ચે પતરા ઉડીને રેલવે ટ્રેક પર પડતા રેલ વ્યવહાર ખોરવાયો હતો. તેમજ હાઈવે પર વૃક્ષો ધરાશાયી થતાં વાહન વ્યવહારને પણ અસર પહોંચી છે. છેલ્લા 24 કલાકમાં રાજ્યના 217 તાલુકામાં વરસાદ નોંધાયો છે. જેમાં સૌથી વધુ વંથલીમાં 14 ઈંચ, વિસાવદરમાં 13 ઈંચ વરસાદ વરસ્યો હતો. ત્યારે આજે પણ રાજ્યના અનેક જિલ્લામાં વરસાદની શક્યતા છે.