સરકારીની સાથે ખાનગી હોસ્પિટલોમાં ઇમર્જન્સી સિવાયની સેવા બંધ

કોલકાતાની મેડિકલ કોલેજમાં જુનિયર મહિલા ડોક્ટર પર દુષ્કર્મ અને હત્યાની ઘટનાના વિરોધમાં આજે ગુજરાતભરની સરકારી હોસ્પિટલોની સાથે ખાનગી હોસ્પિટલોએ સમર્થન આપ્યું છે. હોસ્પિટલોમાં ઇમર્જન્સી સિવાયની તમામ સેવા બંધ રાખવામાં આવી છે. આથી દર્દીઓએ આજે પણ હાલાકીનો સામનો કરવો પડશે. જ્યારે અમદાવાદ મેડિકલ એસોસિએશનના સભ્યો ઇન્કમટેક્સ સુધી રેલી કાઢશે. તેમજ સુરતમાં ડોક્ટરોની રેલી નીકળશે. તેમજ રાજકોટમાં પીડીયુ મેડિકલ કોલેજથી જિલ્લા કલેક્ટર કચેરી સુધી રેલી યોજી ડોક્ટરો કલેક્ટરને આવેદન પાઠવશે.
ગુજરાતની ખાનગી હોસ્પિટલોમાં આજે સવારના 6 વાગ્યાથી આવતીકાલે રવિવારે 6 વાગ્યા સુધી ઓપીડી સેવા બંધ રાખવામાં આવી છે. જ્યારે ઇમર્જન્સી સેવા ચાલુ રાખવામાં આવી છે. આથી હજારો દર્દીઓની સર્જરી પણ રદ કરવામાં આવી છે. અમદાવાદની 1500 ખાનગી હોસ્પિટલોએ આજે હડતાળ પાડી છે. જોકે ઇમરજન્સી સેવા ચાલુ રાખવામાં આવી છે. હડતાળને કારણે શનિવારની અંદાજે 2 હજાર પ્લાન્ડ સર્જરી અને 12થી 15 હજારની ઓપીડી રદ થશે. ઇન્ડિયન મેડિકલ એસોસિએશને સુરક્ષા બિલની માગણી સાથે હડતાળને ટેકો આપ્યો છે. હડતાળમાં રાજ્યની ખાનગી હોસ્પિટલોના 25થી 30 હજાર ડોક્ટરો જોડાયા છે.