જમ્મુ-કાશ્મીરમાં શનિવારે PM મોદીની રેલી દરમિયાન બે સ્થળોએ સુરક્ષા દળો અને આતંકવાદીઓ વચ્ચે એન્કાઉન્ટર ચાલુ છે. શુક્રવારે (13 સપ્ટેમ્બર) કિશ્તવાડના ચત્રુમાં બે જવાનો શહીદ થયા હતા. તેમની ઓળખ નાયબ સુબેદાર વિપિન કુમાર અને વ્હાઇટ નાઈટ કોર્પ્સના કોન્સ્ટેબલ અરવિંદ સિંહ તરીકે થઈ હતી. જ્યારે અન્ય બે જવાનો ઘાયલ થયા છે. સુરક્ષા દળોએ 3-4 આતંકવાદીઓને જંગલોમાં ઘેરી લીધા છે.
અધિકારીઓના જણાવ્યા અનુસાર, તેમને ચત્રુ બેલ્ટના નૈદગામ ગામમાં જૈશ-એ-મોહમ્મદના ત્રણ આતંકવાદીઓ છુપાયા વિશેની બાતમી મળી હતી. આ પછી સુરક્ષા દળોએ સર્ચ ઓપરેશન હાથ ધર્યું હતું. ન્યૂઝ એજન્સી ANI અનુસાર, શુક્રવારે બપોરે લગભગ 3.30 વાગ્યે એન્કાઉન્ટર શરૂ થયું હતું. ઓપરેશન ચાલુ છે. એક સ્થાનિક રહેવાસીએ જણાવ્યું કે સેનાએ વિસ્તારને ઘેરી લીધો છે અને સ્થિતિ ગંભીર છે.
બારામુલ્લામાં પણ એન્કાઉન્ટર, કઠુઆમાં બે આતંકવાદીઓ માર્યા ગયા
બીજી તરફ, ગઈ મોડી રાત્રે બારામુલ્લાના ચક ટેપ્પર ક્રિરી પટ્ટન વિસ્તારમાં પણ એન્કાઉન્ટર શરૂ થયું હતું. કાશ્મીર ઝોન પોલીસે X પર એક પોસ્ટમાં આ માહિતી આપી હતી. પોલીસ અને સેના સ્થળ પર હાજર છે. હાલમાં, વધુ માહિતી બહાર આવી નથી. આ પહેલા કઠુઆના ખંડારામાં પણ સેનાનું ઓપરેશન થયું હતું. અહીં રાઇઝિંગ સ્ટાર કોર્પ્સના જવાનોએ બે આતંકીઓને ઠાર માર્યા હતા. સેનાએ X પર એક પોસ્ટ દ્વારા આ માહિતી આપી હતી. આતંકીઓ પાસેથી મોટી માત્રામાં હથિયારો મળી આવ્યા છે.
જમ્મુ-કાશ્મીરના ડોડામાં આજે PMની રેલી
વડાપ્રધાન નરેન્દ્ર મોદી શનિવારે જમ્મુ-કાશ્મીરના ડોડામાં મેગા રેલીને સંબોધન કરશે. વિધાનસભા ચૂંટણીમાં ભાજપના ઉમેદવારોના સમર્થનમાં તેમના ચૂંટણી પ્રચાર અભિયાનની આ શરૂઆત હશે. આ રેલી દ્વારા પીએમ મોદી ચિનાબ ઘાટી, ડોડા, કિશ્તવાડ અને રામબનના ત્રણ જિલ્લાની 8 વિધાનસભા સીટોના ઉમેદવારોની જીત માટે વોટની અપીલ કરશે. અહીં 18 સપ્ટેમ્બરે મતદાન યોજાશે.
પીએમ મોદી છેલ્લા 50 વર્ષમાં ડોડાની મુલાકાત લેનારા પ્રથમ વડાપ્રધાન હશે. તેમના પહેલા કોઈપણ PMએ 982માં મુલાકાત લીધી હતી. 2014ની ચૂંટણીમાં પીએમ મોદી કિશ્તવાડ સુધી જ ગયા હતા. જમ્મુ-કાશ્મીરની 90 વિધાનસભા બેઠકો પર કુલ ત્રણ તબક્કામાં ચૂંટણી યોજાશે. બીજા તબક્કાનું મતદાન 25 સપ્ટેમ્બરે અને ત્રીજા તબક્કાનું મતદાન 1 ઓક્ટોબરે થશે. પરિણામ 8 ઓક્ટોબરે આવશે. જમ્મુ-કાશ્મીરમાં 10 વર્ષ બાદ વિધાનસભાની ચૂંટણી યોજાઈ રહી છે. છેલ્લે 2014માં વિધાનસભાની ચૂંટણી યોજાઈ હતી.
