પાડોશી દેશ પાકિસ્તાનમાંથી એક ચોંકાવનારા સમાચાર સામે આવ્યા છે. એક બંદૂકધારીએ અંધાધૂંધ ગોળીબાર કરીને 20 લોકોની હત્યા કરી નાખી છે. ખાણમાં કામ કરતા લોકો પર ગોળીઓ છોડવામાં આવી હતી. પાકિસ્તાન પોલીસે આ ઘટનાની માહિતી શેર કરી છે. પોલીસના જણાવ્યા અનુસાર, એક વ્યક્તિ હાથમાં બંદૂક લઈને ખાણમાં ઘુસ્યો અને અંધાધૂંધ ગોળીબાર કરવા લાગ્યો. આ ઘટનામાં 20 મજૂરોના જીવ ગયા હતા. ગોળી વાગવાથી સાત લોકો ગંભીર રીતે ઘાયલ થયા છે.
આ હુમલો પાકિસ્તાનના બલૂચિસ્તાન પ્રાંતમાં થયો હતો. SCO કોન્ફરન્સ પહેલા થયેલા આ હુમલાથી માત્ર પાકિસ્તાનમાં જ નહીં પરંતુ સમગ્ર વિશ્વમાં ખળભળાટ મચી ગયો છે. થોડા દિવસોમાં દુનિયાના ઘણા મોટા દેશોના નેતાઓ પાકિસ્તાન (Pakistan)ની મુલાકાતે જવાના છે. આવી સ્થિતિમાં બલૂચિસ્તાનની ખાણમાં થયેલા આ હુમલાએ સર્વત્ર હલચલ મચાવી દીધી છે.
પોલીસ અધિકારી હિમન્યુ ખાન નાસિરે જણાવ્યું કે, આ ઘટના ગુરુવારે રાત્રે બલૂચિસ્તાનના ડંકી જિલ્લામાં થઈ હતી. એક બંદૂકધારી ડંકી ખાતે કોલસાની ખાણ પાસે આવ્યો અને બધાને સાથે ઊભા રહેવાનો આદેશ આપ્યો. આ પછી બંદૂકધારીએ એક પછી એક બધા પર ગોળીઓ ચલાવવાનું શરૂ કર્યું. આ ઘટનામાં 20 મજૂરોના ઘટનાસ્થળે જ મોત થયા હતા. સાત મજૂરો ગોળીઓથી ઘાયલ થયા હતા.
પાકિસ્તાનમાં આ હુમલો શાંઘાઈ કોઓપરેશન ઓર્ગેનાઈઝેશન પહેલા થયો હતો. આ કોન્ફરન્સ 16-17 ઓક્ટોબરના રોજ પાકિસ્તાનની રાજધાની ઈસ્લામાબાદમાં યોજાવાની છે. આ કોન્ફરન્સમાં ભાગ લેવા માટે ભારતના વિદેશ મંત્રી એસ. જયશંકર પણ 15 ઓક્ટોબરે પાકિસ્તાન જશે. 9 વર્ષમાં ભારતીય વિદેશ મંત્રીની પાકિસ્તાનની આ પ્રથમ મુલાકાત હશે. આ પહેલા ડિસેમ્બર 2015 માં તત્કાલિન વિદેશ મંત્રી સુષ્મા સ્વરાજ પાકિસ્તાનની મુલાકાતે ગયા હતા.
