ન્યૂઝીલેન્ડે સાઉથ આફ્રિકાને 32 રને હરાવીને પહેલી વખત આઇસીસી વીમેન્સ ટી20 વર્લ્ડ કપ જીત્યો છે. જ્યારે સાઉથ આફ્રિકા વીમેન્સ ક્રિકેટમાં પણ ચોકર બન્યું છે. ન્યૂઝીલેન્ડે ટોસ જીતીને બેટિંગમાં ઉતર્યા પછીઅમેલિયા કેરના 38 બોલમાં ચાર ચોગ્ગાની મદદથી 43, બ્રૂક હોલિડેના 28 બોલમાં ત્રણ ચોગ્ગાની મદદથી 38 તથા સુઝલ બેટ્સના 31 બોલમાં ત્રણ ચોગ્ગાની મદદથી 32 રનના સથવારે 20 ઓવરમાં 5 વિકેટે 158 રન કર્યા હતા. જ્યારે તેના જવાબમાં સાઉથ આફ્રિકા ન્યૂઝીલેન્ડના ચુસ્ત બોલિંગ આક્રમણ સામે 9 વિકેટે 126 રન જ કરી શક્યું હતું. સાઉથ આફ્રિકાએ 159 રનના લક્ષ્યાંકનો પીછો કરતાં એક સમયે વિના વિકેટે 51 રન કર્યા ત્યારે તે મેચ જીતી જશે તેમ લાગતું હતું. પણ ન્યૂઝીલેન્ડ તરફથી રોઝમેરી મેર અને અમેલિયા કેરે ત્રણ-ત્રણ વિકેટ ઝડપીને બાજી પલ્ટી નાખી હતી. સાઉથ આફ્રિકાએ પહેલી વિકેટ 51 રને ગુમાવ્યા પછી નિયમિત અંતરે વિકેટ ગુમાવી હતી. ન્યૂઝીલેન્ડની ચુસ્ત બોલિંગનો સાઉથ આફ્રિકાના બેટ્સમેનો પાસે કોઈ જવાબ ન હતો. આ પહેલા ન્યૂઝીલેન્ડે વેસ્ટઇન્ડિઝને અને સાઉથ આફ્રિકાએ ઓસ્ટ્રેલિયાને સેમી ફાઇનલમાં હરાવીને ફાઇનલમાં એન્ટ્રી કરી હતી. ન્યૂઝીલેન્ડે પહેલી જ વખત ટાઇટલ જીત્યું છે. ન્યૂઝીલેન્ડે સેમીફાઈનલ મેચમાં વેસ્ટ ઈન્ડિઝને જીતવા માટે 129 રનનો ટાર્ગેટ આપ્યો હતો, પરંતુ તે આઠ વિકેટે 120 રન જ બનાવી
શકી હતી. મેચમાં કેરેબિયન ટીમ શરૂઆતથી જ વિકેટો ગુમાવતી રહી હતી. ડિઆન્ડ્રા ડોટિને તોફાની ઈનિંગ્સ ચોક્કસ રમી હતી, પરંતુ તે ટીમને જીતના મુકામ સુધી લઈ જઈ શકી નહોતી. ડોટિને 22 બોલમાં ત્રણ સિક્સરની મદદથી 33 રન બનાવ્યા હતા. વેસ્ટ ઈન્ડિઝને જીતવા માટે છેલ્લી ઓવરમાં 15 રનની જરૂર હતી, પરંતુ ન્યૂઝીલેન્ડની પાર્ટ ટાઈમ બોલર સુઝી બેટ્સે માત્ર 6 રન જ આપ્યા હતા. ન્યુઝીલેન્ડ તરફથી એડન કાર્સને સૌથી વધુ 3 વિકેટ લીધી હતી. એમેલિયા કેરને પણ બે સફળતા મળી હતી.
મહિલા T20 વર્લ્ડ કપ 2024 ની પ્રથમ સેમિફાઇનલ મેચ ગુરુવારે (17 ઓક્ટોબર) દક્ષિણ આફ્રિકા અને ઓસ્ટ્રેલિયા વચ્ચે રમાઈ હતી. રોમાંચક મેચમાં આફ્રિકાની ટીમે 8 વિકેટે જીત મેળવીને ફાઇનલમાં પ્રવેશ કર્યો હતો. મેચમાં ટોસ હાર્યા બાદ પ્રથમ બેટિંગ કરવા ઉતરેલી કાંગારૂ ટીમે 5 વિકેટે 134 રન બનાવ્યા હતા. ટીમ તરફથી વિકેટકીપર બેટ્સમેન બેથ મૂનીએ સૌથી વધુ 44 રનની ઇનિંગ રમી હતી. જ્યારે એલિસ પેરીએ 31 રન અને કેપ્ટન તાહિલા મેકગ્રાએ 27 રન બનાવ્યા હતા. 135 રનના ટાર્ગેટના જવાબમાં દક્ષિણ આફ્રિકાએ માત્ર 17.2 ઓવરમાં 2 વિકેટ ગુમાવીને મેચ જીતી લીધી હતી. ટીમ માટે એન બોશે 48 બોલમાં 74 રનની સૌથી વધુ અણનમ મેચ વિનિંગ ઇનિંગ રમી હતી. જ્યારે કેપ્ટન લૌરા વોલ્વાર્ડે 42 રન બનાવ્યા હતા.
