અમદાવાદમાંથી રૂ. 1.30 કરોડના ડ્રગ્સ સાથે એક ઝડપાયો

અમદાવાદ શહેરમાં સતત બીજા દિવસે એમડી ડ્રગ્સ ઝડપાયું છે. બુધવારે શહેરના નારણપુરા વિસ્તારમાં આવેલા એક ફ્લેટમાંથી રૂ. 25.68 લાખના એમડી ડ્રગ્સ સાથે ડ્રગ્સની સિન્ડિકેટનો પર્દાફાશ થયા બાદ ગણતરીના કલાકોમાં જ શહેરના દાણીલીમડા વિસ્તારમાંથી ક્રાઈમ બ્રાંચે એક શખ્સને સવા કિલો એમડી ડ્રગ્સ સાથે ઝડપી પાડ્યો છે. આરોપીના કબજામાંથી પોલીસે બે હથિયાર અને 40 જીવતા કાર્ટિઝ પણ મળી આવ્યા હતા.
અમદાવાદ ક્રાઈમ બ્રાન્ચે શહેરના દાણીલીમડા વિસ્તારમાંથી ઝિશાન દત્તા પવલે નામના એક શખ્સને રૂ. 1.30 કરોડની કિંમતના 1 કિલો 230 ગ્રામ એમડી ડ્ર્ગસ સાથે ઝડપી પાડ્યો હતો. દાણીલીમડા વિસ્તારમાંથી ઝડપાયેલો આરોપી ડ્રગ્સનો આટલો મોટો જથ્થો ક્યાંથી લાવ્યો હતો અને કોને પહોંચાડવાનો હતો?, તેની પાસેથી ઝડપાયેલા હથિયારનો ક્યાં ઉપયોગ કરવાનો હતો તે અંગે વધુ તપાસ હાથ ધરી છે.
ઝડપાયેલા આરોપીના કબજામાંથી પોલીસે 2 હથિયાર, 40 જીવતા કાર્ટિઝ અને 18 લાખ રૂપિયા કબજે કર્યા છે. ડ્રગ્સના જથ્થા સાથે ઝડપાયેલો આરોપી હથિયારનો શું ઉપયોગ કરવાનો હતો તેને લઈને પણ પોલીસે તપાસ હાથ ધરી છે. આરોપી ભૂતકાળમાં પણ અન્ય ગુનામાં સંડોવાઈ ચૂક્યો હોવાનું પ્રાથમિક તપાસમાં સામે આવ્યું છે.