મહારાષ્ટ્ર વિધાનસભા ચૂંટણીના પરિણામોના 11 દિવસ બાદ બુધવારે નવા CMની જાહેરાત થઈ શકે છે. સવારે ભાજપ ધારાસભ્ય દળની બેઠક પણ મળશે. જેમાં ધારાસભ્ય દળના નેતાની પસંદગી કરવામાં આવશે. ગુજરાતના પૂર્વ મુખ્યમંત્રી વિજય રૂપાણી અને નાણામંત્રી નિર્મલા સીતારમણ નિરીક્ષક તરીકે હાજરી આપશે. 3 ડિસેમ્બરની સાંજે દેવેન્દ્ર ફડણવીસે કાર્યકારી મુખ્યમંત્રી એકનાથ શિંદે સાથે સીએમ હાઉસ વર્ષા ખાતે અડધો કલાક મુલાકાત કરી હતી. મહારાષ્ટ્ર ચૂંટણી બાદ બંનેની આ બીજી મુલાકાત હતી. આ પહેલા બંને દિલ્હીમાં મળ્યા હતા. ફડણવીસ પહેલા ભાજપના નેતાઓ ગિરીશ મહાજન અને ઉદય સામંત મંત્રાલયના ફાળવણી અંગે શિંદેને મળ્યા હતા.
ભાજપના કેન્દ્રીય નિરીક્ષકો ભાજપના ધારાસભ્ય દળના નેતાની ચૂંટણી બાદ એકનાથ શિંદેને મળશે. તેમની હાજરીમાં સત્તા-શેરિંગની અંતિમ ફોર્મ્યુલા પર ચર્ચા કરવામાં આવશે. આ પછી, નામાંકિત મુખ્યમંત્રી અને બે નાયબ મુખ્યમંત્રી રાજ્યપાલને મળશે અને સરકાર બનાવવાનો દાવો રજૂ કરશે. શપથ સમારોહ 5 ડિસેમ્બરે સાંજે 5 વાગ્યે મુંબઈના આઝાદ મેદાનમાં યોજાશે.
મહાયુતિના 31 નેતાઓ મંત્રી તરીકે શપથ લઈ શકે છે. જેમાં ભાજપના 19, એનસીપીના 7 અને શિવસેનાના 5 ધારાસભ્યોના નામ આજે ફાઈનલ કરવામાં આવશે. મહારાષ્ટ્ર ચૂંટણીના પરિણામો 23 નવેમ્બરના રોજ આવ્યા હતા. મહાયુતિ એટલે કે ભાજપ-શિવસેના શિંદે-એનસીપી પવારને 230 બેઠકોની ભારે બહુમતી મળી. જો કે ભાજપ તરફથી દેવેન્દ્ર ફડણવીસ સીએમ બનશે તે નિશ્ચિત માનવામાં આવે છે. મહાયુતિ એટલે કે ભાજપ, શિવસેના શિંદે અને એનસીપીમાં એક સીએમ અને બે ડેપ્યુટી સીએમની ફોર્મ્યુલા નક્કી કરવામાં આવી છે.
