NATO છોડી દેશે અમેરિકા : ટ્રમ્પે જાહેર કર્યો પોતાનો એજન્ડા

ડોનાલ્ડ ટ્રમ્પે એક ટીવી ચેનલને આપેલા ઈન્ટરવ્યૂમાં રાષ્ટ્રપતિ પદના શપથ લીધા બાદનો પોતાનો એજન્ડા જાહેર કર્યો હતો. ટ્રમ્પે ફરી એકવાર અમેરિકામાં રહેતા ગેરકાયદેસર ઇમિગ્રન્ટ્સને દેશમાંથી બહાર કાઢવાની પોતાની યોજનાનો પુનરોચ્ચાર કર્યો. તેમણે ડ્રીમર્સ ઈમિગ્રન્ટ્સની સુરક્ષા માટે પગલાં લેવાની વાત પણ કરી હતી. ડ્રીમર્સ ઈમિગ્રન્ટ્સ એવા ઈમિગ્રન્ટ્સ છે જે બાળપણમાં અમેરિકા આવ્યા હતા અને તેમની પાસે કોઈ દસ્તાવેજ નથી.
ટ્રમ્પે કહ્યું કે ઓફિસમાં તેમના પ્રથમ દિવસે જ તેઓ જન્મ સમયે અમેરિકન નાગરિકતાના અધિકારને હટાવી દેશે. અમેરિકી બંધારણના 14મા સુધારા મુજબ અમેરિકામાં જન્મ લેનાર કોઈપણ બાળક જન્મતાની સાથે જ અમેરિકન નાગરિકત્વ મેળવી લે છે. ભલે તેના માતાપિતા કોઈપણ દેશની નાગરિકતા ધરાવતા હોય.જો કે, ટ્રમ્પના નિર્ણયને કાયદાકીય અડચણોનો સામનો કરવો પડી શકે છે. ઇન્ટરવ્યૂ દરમિયાન ટ્રમ્પે નાટો વિશે કહ્યું હતું કે રાષ્ટ્રપતિ બન્યા બાદ તે તેનાથી ખસી જવા અંગે ગંભીરતાથી વિચાર કરશે. તેમણે એ પણ વચન આપ્યું હતું કે તે ગર્ભપાતની ગોળીઓ પર પ્રતિબંધ મૂકશે નહીં.વટ્રમ્પે એમ પણ કહ્યું કે રાષ્ટ્રપતિ બન્યા બાદ ફેડરલ રિઝર્વ (સેન્ટ્રલ બેંક)ના ચેરમેન જેરોમ પોવેલને પદ છોડવા માટે કહેવાની તેમની કોઈ યોજના નથી.
ટ્રમ્પે વચન આપ્યું કે તેઓ રાષ્ટ્રપતિ બનતાની સાથે જ કેપિટલ હિલ કેસના ગુનેગારોને માફ કરવા માટે પગલાં લેશે. ટ્રમ્પ 2020માં રાષ્ટ્રપતિની ચૂંટણી હારી ગયા પછી 6 જાન્યુઆરી, 2021ના ​​રોજ તેમના કેટલાક સમર્થકો કેપિટલ હિલ (યુએસ સંસદ)માં પ્રવેશ્યા અને લૂંટફાટ કરી હતી.વર્ષ 2021માં ટ્રમ્પ સમર્થકોએ યુએસ કેપિટલ હિલની ઇમારત યુએસ સંસદમાં પ્રદર્શન કર્યું. આ લોકોએ ચૂંટણી પરિણામો રદ કરવાની માગ કરી હતી. નિષ્ણાતોનું કહેવું છે કે ટ્રમ્પની ઘણી યોજનાઓને કોર્ટમાં મુશ્કેલીનો સામનો કરવો પડી શકે છે. આ સિવાય નાટોથી અલગ થવાની તેમની યોજના અમેરિકન છાવણીના દેશોમાં બેચેની પેદા કરી શકે છે.