મહારાષ્ટ્રમાં મહાયુતિની સરકાર બન્યા બાદ નારાજગીનો દોર જારી રહ્યો છે. અનેક નેતાઓની પીડા દેખાઈ રહી છે. પરંતુ NCP (અજિત જૂથ)ના વરિષ્ઠ નેતા છગન ભુજબળે હવે ખુલ્લેઆમ પોતાની નારાજગી વ્યક્ત કરી છે. મંગળવારે તેમણે કહ્યું, ‘જ્યાં ચેન ન હોય ત્યાં ન રહો.’ તેમના નિવેદન પરથી અનેક અર્થ કાઢવામાં આવી રહ્યા છે. તે જ સમયે, મંગળવારે છગનના સમર્થકોએ પુણેમાં અજિત પવાર વિરુદ્ધ પ્રદર્શન પણ કર્યું હતું. તેમણે કહ્યું કે આ અન્ય પછાત વર્ગ (ઓબીસી)નું અપમાન છે. બારામતીમાં નાયબ મુખ્ય પ્રધાન અને NCP વડા અજિત પવારના બંગલા બહાર પણ પ્રદર્શન થયું.
છગન ભુજબળે દાવો કર્યો હતો કે મહારાષ્ટ્રના મુખ્ય પ્રધાન દેવેન્દ્ર ફડણવીસ તેમને કેબિનેટમાં સામેલ કરવા માગે છે, પરંતુ નિર્ણય અજિત પવારે લીધો હતો. 77 વર્ષના ધારાસભ્ય ભુજબળ અગાઉ મહાયુતિ સરકારમાં મંત્રી હતા. પરંતુ આ વખતે તેને સ્થાન આપવામાં આવ્યું નથી.ભુજબળે કહ્યું કે NCPમાં અજિત પવાર નિર્ણયો લે છે, જેમ કે ભાજપમાં દેવેન્દ્ર ફડણવીસ અને શિવસેનામાં એકનાથ શિંદે. એક દિવસ પહેલા આપેલા તેમના નિવેદન પર સ્પષ્ટતા કરતા કહ્યું કે, ‘તેઓ બુધવારે એનસીપી કાર્યકરો અને તેમની યેલા બેઠકના લોકો સાથે ચર્ચા કર્યા પછી કંઈક કહેશે.’ ભુજબળે કહ્યું હતું કે, ‘મને મંત્રી ન બનાવવામાં આવ્યા તેનાથી હું દુઃખી નથી, પરંતુ મારી સાથે જે વર્તન કરવામાં આવ્યું તેનાથી હું દુખી છું.’
‘હું રમકડું નથી’
નાસિકમાં મીડિયા સાથે વાત કરતા ભુજબળે કહ્યું કે તેમને મે મહિનામાં લોકસભાની ચૂંટણી લડવા માટે કહેવામાં આવ્યું હતું, પરંતુ નામ ફાઈનલ થયું ન હતું. ત્યારબાદ તેમને રાજ્યસભાની સીટની ઓફર કરવામાં આવી હતી, જેને તેમણે ફગાવી દીધી હતી. તેમણે કહ્યું, ‘મેં નાસિકથી લોકસભા ચૂંટણી લડવાના સૂચનને સ્વીકાર્યું. જ્યારે હું રાજ્યસભામાં જવા માંગતો હતો ત્યારે મને વિધાનસભાની ચૂંટણી લડવાનું કહેવામાં આવ્યું હતું. હવે મને રાજ્યસભાની બેઠકની ઓફર કરવામાં આવી રહી છે. શું હું રમકડું છું? તમે કહો ત્યારે હું ઊભો થઈ જાઉં અને કહે ત્યારે બેસી જાઉં? જો હું રાજીનામું આપીશ તો મારા મત વિસ્તારના લોકો શું વિચારશે?’
ભુજબળે કહ્યું કે, ‘વડાપ્રધાન નરેન્દ્ર મોદી અને ગૃહમંત્રી અમિત શાહના કહેવા પર હું લોકસભા ચૂંટણી માટે તૈયાર થયો હતો. મેં એક મહિના સુધી તૈયારી કરી, પરંતુ છેલ્લી ક્ષણે મારું નામ કાઢી નાખવામાં આવ્યું. ત્યારે મને કહેવામાં આવ્યું કે મારે મહારાષ્ટ્રમાં જ રહેવું જોઈએ. તેમણે આગળ કહ્યું, ‘મારી સાથે જે થયું તે અપમાનજનક છે. આ મંત્રીપદનો પ્રશ્ન નથી, પરંતુ મારી સાથે કરવામાં આવતા વ્યવહારનો પ્રશ્ન છે. ભવિષ્યના પ્રશ્ન પર તેમણે કહ્યું કે તેઓ કાર્યકરો સાથે વાત કરીને નિર્ણય લેશે.
