જન્મદિવસ પર માતાએ ફોન ન લઈ આપતા 15 વર્ષના પુત્રએ કર્યો આપઘાત

મહારાષ્ટ્રના સાંગલી જિલ્લામાંથી એક હ્રદયસ્પર્શી કિસ્સો સામે આવ્યો છે. અહીં એક 15 વર્ષના છોકરાએ ગળાફાંસો ખાઈને આત્મહત્યા કરી લીધી કારણ કે તેની માતાએ તેને તેના જન્મદિવસ પર નવો ફોન અપાવવાની ના પાડી હતી!સ્થાનિક પોલીસના જણાવ્યા અનુસાર, આ સમગ્ર ઘટના શનિવારે રાત્રે મિરાજ શહેરમાં બની હતી. પોલીસે જણાવ્યું કે અહીં 15 વર્ષીય રમેશ ચમદાનવાલેએ રાત્રે તેની માતા અને બહેનને સૂઈ ગયા બાદ પોતાના ઘરમાં ગળાફાંસો ખાઈને આત્મહત્યા કરી લીધી.
પ્રાથમિક પૂછપરછ મુજબ રમેશનો બે દિવસ પહેલા જન્મદિવસ હતો. તેણે તેની માતાને તેના જન્મદિવસ પર નવો ફોન લાવવા કહ્યું પરંતુ તેની માતાએ પૈસા ન હોવાનું કહી તેની ઇચ્છા પૂરી કરવાનો ઇનકાર કર્યો હતો. જેના કારણે તે છેલ્લા બે દિવસથી સમગ્ર પરિવારથી નારાજ હતો. શનિવારે રાત્રે તેનો ગુસ્સો એટલો વધી ગયો હતો કે તેણે ગળેફાંસો ખાઈ જીવનનો અંત આણ્યો હતો. બીજા દિવસે જ્યારે પરિવારના સભ્યો જાગ્યા ત્યારે તેમને રમેશ લટકતો જોવા મળ્યો. માહિતી મળતાં જ પોલીસ ત્યાં પહોંચી હતી અને પરિવારજનોની માહિતીના આધારે અકસ્માતે મોતની નોંધ કરી હતી.