ગુજરાત સરકાર આગામી એક દાયદામાં મોટી સંખ્યામાં કર્મચારીઓની ભરતી કરશે. ગુજરાત સરકાર 18 ડિપાર્ટમેન્ટમાં 82,675 કર્મચારીઓની સીધી ભરતી કરશે અને તેના માટે એક વ્યાપક શેડ્યુલ તૈયાર કર્યું છે. જેમાં શિક્ષણ અને આરોગ્યથી લઈને પરિવાર કલ્યાણ સહિતના આઠ વિભાગો માટે ભરતી ચર્ચા ચાલી રહી છે.અધિકારીઓનું કહેવું છે કે, રાજ્ય સરકારના વિવિધ વિભાગોમાં ભરતીની ચર્ચા કરવામાં આવી હતી અને તેમાં આગામી 10 વર્ષમાં રાજ્ય સરકારમાં અંદાજીત 1.5 લાખ નવા કર્મચારીઓની ભરતી થઈ શકે છે. 10 વર્ષમાં 18 વિભાગોમાં ભરતી કરવામાં આવશે અને તેને અંતિમ સ્વરૂપ આપવામાં આવ્યું છે. જેમાં આઠ વિભાગોમાં ભરતી કરવામાં માટે ચર્ચા ચાલી રહી છે. જોકે, અધિકારીઓએ જણાવ્યું હતું કે, સીધી ભરતીની કુલ સંખ્યા 1.5 લાખ સુધી પહોંચશે તેવી અપેક્ષા છે.
18 વિભાગોમાંથી જ્યાં 82,675 કર્મચારીઓની ભરતી નક્કી કરવામાં આવી છે, તેમાં ગૃહ વિભાગનો હિસ્સો 50 ટકાથી વધુ છે. એટલે કે ગૃહ વિભાગમાં સૌથી વધુ ભરતી થશે. સરકારે આગામી દસ વર્ષમાં ગૃહ વિભાગમાં 43,389 કર્મચારીઓની નિમણૂકને મંજૂરી આપી છે. જે વિભાગોમાં ભરતી અંગેની ચર્ચા ચાલી રહી છે.તેમાં લેબર, સ્કિલ ડેવલપમેન્ટ અને એમ્પ્લોયમેન્ટ ડિપાર્ટમેન્ટ, અર્બન ડેવલપમેન્ટ અને અર્બન હાઉસિંગ ડિપાર્ટમેન્ટ, પંચાયતો, રૂરલ હાઉસિંગ અને રૂરલ ડેવલપમેન્ટ, ઈન્ડસ્ટ્રીઝ અને માઈન્સ ડિપાર્ટમેન્ટ, સ્પોર્ટ્સ, યુથ અને કલ્ચર એક્ટિવિટિઝ ડિપાર્ટમેન્ટ અને બાકીની કેડર્સમાં હેલ્થ ડિપાર્ટમેન્ટનો સમાવેશ થાય છે. જે વિભાગો માટે હજી ભરતી અંગેની ચર્ચા-વિચારણ કરવામાં આવી નથી તેમાં ઊર્જા અને પેટ્રોકેમિકલ્સ વિભાગ અને શિક્ષણ વિભાગનો સમાવેશ થાય છે.
આ કવાયત સાથે સંકળાયેલા એક વરિષ્ઠ સરકારી અધિકારીએ જણાવ્યું હતું કે, બાકીના તમામ વિભાગો માટે ભરતી અંગે આગામી થોડા અડવાડિયામાં વિચાર-વિમર્શ કરવામાં આવશે અને કેટલા કર્મચારીઓની ભરતી કરવી તે નક્કી કરવામાં આવશે. એકંદરે સીધી ભરતી 1 લાખને વટાવી જવાની અપેક્ષા છે.” અધિકારીએ સ્પષ્ટ કર્યું કે આ આંકડાઓ આઉટસોર્સિંગ મિકેનિઝમ દ્વારા ભરવામાં આવેલી જગ્યાઓને બાદ કરતાં સરકારી સેવામાં સીધી ભરતીનું પ્રતિનિધિત્વ કરે છે.
અધિકારીઓએ વિગતવાર જણાવ્યું કે, ગુજરાત પબ્લિક સર્વિસ કમિશન એટલેકે GPSC તથા ગુજરાત સબઓર્ડિનેટ સર્વિસિસ સિલેક્શન બોર્ડ એટલે કે GSSSB વગેરે સહિતની તમામ ભરતી એજન્સીઓ વર્ષ મુજબની ભરતી યોજનાનું પાલન કરશે અને GAD 10 વર્ષના શેડ્યુલની સામે ભરતી અંગેનું નિરીક્ષણ કરશે. 82,675 એપોઈન્ટમેન્ટ્સને અંતિમ સ્વરૂપ આપવામાં આવ્યું છે, તેમાં મોટાભાગની વર્ગ-3ની જગ્યાઓ છે. વર્ગ-3 માટે 78,241 કર્મચારીઓની ભરતી કરવામાં આવશે. જ્યારે વર્ગ-2માં 3950 નવી ભરતી કરવામાં આવશે અને વર્ગ-1માં 484 કર્મચારીઓની નિમણૂક કરવામાં આવશે, તેમ સરકારી સૂત્રોએ જણાવ્યું હતું.
