નેશનલ ઇન્વેસ્ટિગેશન એજન્સી એ કહ્યું કે તેણે 2024માં 210 આરોપીઓની ધરપકડ કરી હતી. આ સાથે 25 કેસમાં 68 આરોપીઓને દોષિત સાબિત કરીને 100% કન્વિક્શન રેટ મેળવવામાં આવ્યો હતો. આ એજન્સીની રેકોર્ડબ્રેક સિદ્ધિ છે.NIAએ ગુનાઓની વિવિધ કેટેગરીઓ હેઠળ 80 કેસ નોંધ્યા હતા, જેમાં 210 આરોપીઓની ધરપકડ કરવામાં આવી હતી. 2024માં 27 ફરાર ગુનેગારો પણ ઝડપાયા હતા. આ સિવાય 408 આરોપીઓ સામે ચાર્જશીટ દાખલ કરવામાં આવી હતી.આતંકવાદી, ગેંગસ્ટર અને અન્ય ગુનાહિત નેટવર્કને ખતમ કરવાના તેના પ્રયાસોના ભાગ રૂપે, એજન્સીએ 2024માં 19.57 કરોડ રૂપિયાની કુલ 137 મિલકતો જપ્ત કરી.
નોંધાયેલા 80 કેસમાંથી 28 ડાબેરી ઉગ્રવાદના હતા. આ કેટેગરીમાં 64 આરોપો સામે 12 ચાર્જશીટ રજુ કરવામાં આવી હતી. આ પછી, 18 કેસ પૂર્વોત્તરમાં વિદ્રોહ સાથે સંબંધિત છે, 7 કેસ જમ્મુ અને કાશ્મીરમાં જેહાદ સાથે સંબંધિત છે, 6 કેસ વિસ્ફોટના છે, 5 કેસ માનવ તસ્કરી સાથે જોડાયેલા છે, 4 અન્ય કેસ જેહાદ સાથે સંબંધિત છે. ચાર કેસ ખાલિસ્તાની કેસ અને બે ISIS જેહાદી કેસ હતા. ગેંગસ્ટર, સાયબર ટેરરિઝમ, ફેક કરન્સી અને અન્ય કેટેગરીમાં એક-એક કેસ નોંધવામાં આવ્યો હતો. એકંદરે, NIAએ આ વર્ષે તમામ પ્રકારના કેસોમાં 662 સર્ચ હાથ ધર્યા હતા. તેમાંથી વિદેશી સંબંધિત ખાલિસ્તાની આતંકવાદી કેસોમાં 101 સર્ચ કરવામાં આવ્યા હતા, જ્યારે 14 લોકોની ધરપકડ કરવામાં આવી હતી. VHP નેતા વિકાસ પ્રભાકર ઉર્ફે વિકાસ બગ્ગાની હત્યાના થોડા મહિનાઓમાં જ NIAએ પાકિસ્તાન ખાતેના બબ્બર ખાલસા ઈન્ટરનેશનલના વડા વાધવા સિંહ ઉર્ફે બબ્બર અને અન્ય પાંચ આતંકવાદીઓ વિરુદ્ધ ચાર્જશીટ રજુ કરી.
આ સિવાય NIAએ એન્ટી નેશનલ ફોર્સેજ પાસેથી મોટી માત્રામાં હથિયારો જપ્ત કર્યા છે. જમ્મુ, જયપુર, રાંચી, પટના અને ચંદીગઢ સહિત દેશના ઘણા શહેરોમાંથી હથિયારો જપ્ત કરવામાં આવ્યા હતા. જમ્મુમાં હિઝબુલ મુજાહિદ્દીન આતંકવાદી સંગઠનના ઓવરગ્રાઉન્ડ વર્કર તરીકે કામ કરતા કાર ડ્રાઈવર પાસેથી દારૂગોળો મળી આવ્યો હતો. જેમાં બે હેન્ડ ગ્રેનેડ, 34 9 એમએમ પિસ્તોલ રાઉન્ડ, એક ચાઈનીઝ પિસ્તોલ, એક ટર્કિશ પિસ્તોલ, 20 ચાઈનીઝ પિસ્તોલ રાઉન્ડ અને એક પિસ્તોલ સાઈલેન્સરનો સમાવેશ થાય છે. NIAએ ઉત્તર-પૂર્વીય રાજ્યો અને આંતરરાષ્ટ્રીય સરહદ પાર હાજર બેકાબૂ સંગઠનોના સભ્યોને પૂરા પાડવામાં આવતા હથિયારો પણ રિકવર કર્યા છે. જેમાં પાંચ રાઈફલ, છ પિસ્તોલ, એક રિવોલ્વર, 215 રાઉન્ડ ગોળીઓ, પાંચ ડિટોનેટર, ગન પાવડરના બે પેકેટ, 75 ખાલી કારતુસ અને 75 કિલો વિસ્ફોટક સામગ્રી પણ જપ્ત કરવામાં આવી હતી.
