કેલિફોર્નિયામાં બિલ્ડિંગની છત સાથે પ્લેન અથડાતા 2ના મોત, 14થી વઘુ ઇજાગ્રસ્ત

દક્ષિણી કેલિફોર્નિયામાં એક પ્લેન ક્રેશનો મામલો સામે આવ્યો છે. સ્થાનિક મીડિયા અનુસાર, એક નાનું વિમાન ફર્નિચર વેરહાઉસની છત સાથે અથડાયું હતું. આ દુર્ઘટનામાં 2 લોકોના મોત થયા છે અને લગભગ 15 લોકો ઈજાગ્રસ્ત હોવાનું કહેવાય છે.
જે ફૂટેજ સામે આવ્યા છે તેમાં, વેરહાઉસની છતમાંથી ધુમાડો નીકળતો જોવા મળ્યો હતો જ્યાં પ્લેન લગભગ 2:15 વાગ્યે બિલ્ડિંગ સાથે અથડાયું હતું. આ સાથે ફાયર બ્રિગેડના જવાનોએ ઘટનાસ્થળે પહોંચી ઈજાગ્રસ્તોને બચાવ્યા હતા. દુર્ઘટના બાદ સ્થળ પર આગ ફાટી નીકળી હતી. આગથી વેરહાઉસને નુકસાન થયું હતું, જેમાં સિલાઈ મશીન અને કાપડનો સ્ટોક હતો. એજન્સીના રિપોર્ટ અનુસાર, પોલીસે જણાવ્યું છે કે, ‘ઈજાગ્રસ્તોને હોસ્પિટલમાં લઈ જવામાં આવ્યા છે. આ કયા પ્રકારનું પ્લેન હતું અથવા ઈજાગ્રસ્ત લોકો પ્લેનમાં હતા કે જમીન પર હતા તે તરત જ જાણી શકાયું નથી.’