બોલિવૂડ એક્ટર સૈફ અલી ખાન પર ચોરે ઘરમાં ઘુસીને ચાકુથી હુમલો કર્યો હતો જે બાદ લીલાવતી હોસ્પિટલમાં દાખલ કરવામાં આવ્યો છે. આ ઘટના દરમિયાન એક્ટર સૈફ અલી ખાન અને ચોર વચ્ચે મારામારી પણ થઇ હતી. ઘટના બાદ પોલીસે ઘટનાની તપાસ શરૂ કરી છે. સૈફના ઘરમાં કામ કરનારા ત્રણ કર્મચારીઓને પૂછપરછ માટે પોલીસ સ્ટેશન લઇ જવામાં આવ્યા છે.
સૂત્રો અનુસાર, પોલીસે ઘટનાના બે કલાક પહેલાના CCTV ફૂટેજની તપાસ શરૂ કરી છે પરંતુ ઘરની અંદર કોઇ આવતું જોવા મળતું નથી. પોલીસને શક છે કે હુમલાખોર પહેલાથી જ બિલ્ડિંગ અને ઘરમાં ઘુસ્યો હતો. અત્યારે CCTVની તપાસ ચાલી રહી છે. સૈફની બિલ્ડિંગના અન્ય ફ્લેટ અને આસપાસની બિલ્ડિંગમાં કામ કરનારા કર્મચારી/ સફાઇ કર્મચારી વિશે પણ જાણકારી ભેગી કરવામાં આવી રહી છે.
પોલીસ સૈફના ત્રણ સ્ટાફના નિવેદન નોંધી રહી છે. પોલીસને સૈફની મેડ પર શક છે માટે પહેલા મેડની સારવાર કરવામાં આવશે અને પછી તેનું નિવેદન લેવામાં આવશે. સુત્રો અનુસાર હુમલાખોરે પહેલા નોકરાણી પર હુમલો કર્યો હતો અને બન્ને વચ્ચે મારામારી થઇ હતી. પોલીસનો દાવો છે કે આરોપી સૈફના ઘરમાં કામ કરનારી મેડને મળવા આવ્યો હશે.
પોલીસના એક અધિકારીએ જણાવ્યું કે શરૂઆતની જાણકારી અનુસાર, એક અજાણ્યો વ્યક્તિ સૈફ અલી ખાનના ઘરમાં ઘુસ્યો હતો અને બન્ને વચ્ચે મારામારી થઇ હતી. ઘટનાના સમયે અભિનેતાના કેટલાક પરિવારજનો ઘરમાં હાજર હતા. મુંબઇ ક્રાઇમ બ્રાન્ચની ટીમ સૈફ અલી ખાનના ઘરમાં તપાસ કરી રહી છે. સૈફ અલી ખાનની લીલાવતી હોસ્પિટલમાં સર્જરી કરવામાં આવી છે.
