અમેરિકામાં રાષ્ટ્રપતિ ડોનાલ્ડ ટ્રમ્પે કાર્યભાર સંભાળ્યાના પ્રથમ દિવસે ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) એ 308 ગેરકાયદે ઇમિગ્રન્ટ્સની ધરપકડ કરી છે. દેશના દરેક ભાગમાંથી આ ધરપકડો કરવામાં આવી છે. આમાંના મોટાભાગના ગેરકાયદેસર વસાહતીઓ ગુનેગારો છે. તેમાંથી કેટલાક પર અપહરણ, હત્યા અને બળાત્કારનો આરોપ છે.
ધ ન્યૂયોર્ક પોસ્ટ અનુસાર, બોર્ડર સિક્યુરિટી ઓફિસર ટોમ હોમને આ વાતનો ખુલાસો કર્યો છે.હોમને બુધવારે જણાવ્યું હતું કે ઇમિગ્રેશન અધિકારીઓએ દેશ માટે જોખમ ઊભું કરનારા ગેરકાયદે ઇમિગ્રન્ટ્સની ધરપકડ કરવાનું શરૂ કરી દીધું છે. તેમની વસ્તી 7 લાખથી વધુ છે. બંગાળી અખબાર પ્રથમ અલોના અહેવાલ મુજબ, પ્રથમ દિવસે પકડાયેલા લોકોમાં 4 બાંગ્લાદેશી નાગરિકો હતા. ન્યૂયોર્કના બ્રુકલિન બરો ફુલ્ટન વિસ્તારમાંથી તેની ધરપકડ કરવામાં આવી છે.
રિપોર્ટ અનુસાર અમેરિકાના ઘણા રાજ્યોમાં દરોડા પાડવામાં આવી રહ્યા છે અને મોટા પાયે ઈમિગ્રન્ટ્સની પૂછપરછ કરવામાં આવી રહી છે. પ્રમુખપદની ચૂંટણી જીત્યાના થોડા જ દિવસો બાદ, ટ્રમ્પે ભૂતપૂર્વ ઇમિગ્રેશન એન્ડ કસ્ટમ્સ એન્ફોર્સમેન્ટ (ICE)ના વડા ટોમ હોમનને ‘બોર્ડર ઝાર’ તરીકે નિયુક્ત કર્યા. હોમને ગયા અઠવાડિયે જાહેરાત કરી હતી કે ટ્રમ્પના ઉદ્ઘાટનના બીજા દિવસે તેઓ બિનદસ્તાવેજીકૃત ઇમિગ્રન્ટ્સની દેશવ્યાપી શોધ અને ધરપકડ શરૂ કરશે.
શપથ લીધા બાદ ટ્રમ્પે અનેક એક્ઝિક્યુટિવ ઓર્ડર પર હસ્તાક્ષર કર્યા હતા. જેમાં ગેરકાયદેસર વસાહતીઓનો પ્રવેશ રોકવા અને સરહદ પર સુરક્ષા કડક કરવા જેવા આદેશો હતા. શપથ દરમિયાન પણ ટ્રમ્પે ગેરકાયદેસર ઈમિગ્રન્ટ્સને અમેરિકામાંથી બહાર કાઢવાની વાત કરી હતી. તેમણે કહ્યું હતું કે ખૂબ જ ટૂંક સમયમાં અમેરિકાના ઈતિહાસનું સૌથી મોટું દેશનિકાલ અભિયાન શરૂ થશે.
વિશ્વમાં સૌથી વધુ ઇમિગ્રન્ટ્સ અમેરિકામાં
પ્યુ રિસર્ચ સેન્ટરના જણાવ્યા અનુસાર, વિશ્વમાં સૌથી વધુ ઇમિગ્રન્ટ્સ અમેરિકામાં છે. વિશ્વના કુલ 20% ઇમિગ્રન્ટ્સ માત્ર અમેરિકામાં જ રહે છે. 2023 સુધીમાં અહીં વસતા કુલ ઈમિગ્રન્ટ્સની સંખ્યા 4.78 કરોડ હતી. ટ્રમ્પનું માનવું છે કે અન્ય દેશોના લોકો અમેરિકામાં ગેરકાયદે પ્રવેશ કરીને અપરાધ કરે છે.
