લોસ એન્જલસ નજીક ફરી આગ : 31 હજાર લોકોને ઘર છોડવાનો આદેશ

અમેરિકાના લોસ એન્જલસ નજીકના ઉત્તરીય વિસ્તારમાં બુધવારે જંગલમાં નવી આગ લાગી છે. આગને કારણે 31 હજાર લોકોને તેમના ઘર ખાલી કરવાનો આદેશ આપવામાં આવ્યો છે. કાસ્ટેઇક તળાવ નજીકની ટેકરીઓમાં ભીષણ આગ ફાટી નીકળી હતી. તે થોડા કલાકોમાં 8,000 એકરથી વધુ વિસ્તારમાં ફેલાઈ ગઈ હતી.
ભારે પવને આગને વધુ ભડકાવી દીધી છે. આ વિસ્તારમાં સાન્ટા એનાના પવનો ખૂબ જ તીવ્ર અને સૂકા છે. આ કારણે આગ ઝડપથી ફેલાઈ રહી છે. તળાવની આસપાસ રહેતા 31,000 લોકોને સ્થળાંતર કરવાનો આદેશ જારી કરવામાં આવ્યો છે. આ તળાવ લોસ એન્જલસથી લગભગ 56 કિલોમીટર ઉત્તરમાં અને સાન્ટા ક્લેરિટા શહેરની નજીક સ્થિત છે.
લોસ એન્જલસ કાઉન્ટી શેરિફ રોબર્ટ લુનાએ જણાવ્યું હતું કે આગને કારણે કાસ્ટેઇકમાં પિચેસ ડિટેન્શન સેન્ટર ખાલી કરાવવાનો આદેશ આપવામાં આવ્યો છે. અહીં રાખવામાં આવેલા લગભગ 500 કેદીઓને બીજી જેલમાં મોકલવામાં આવ્યા છે.