છેલ્લાં અઢી વર્ષથી ઘેરી મંદીમાં સપડાયેલી ડાયમંડ ઈન્ડસ્ટ્રી માટે હાલમાં તેજીના સંકેત જોવા મળી રહ્યા છે. ખાસ કરીને વીંટી, મંગળસૂત્ર અને બુટ્ટીમાં ઉપયોગમાં લેવામાં આવતા માઈનસ-2 સાઈઝના હીરાની ડિમાન્ડમાં વધારો થતો જોવા મળી રહ્યો છે, જેના કારણે આ પ્રકારના હીરાના કેરેટના ભાવમાં છેલ્લાં 15 દિવસમાં જ સરેરાશ 10 ટકા એટલે કે, 1500 રૂપિયાનો વધારો થયો છે, જ્યારે દિવાળી બાદ કેરેટના ભાવામાં 3 હજારનો વધારો જોવા મળ્યો છે.
માઈનસ-2 સાઈઝના હીરાની ડિમાન્ડ તાઈવાન, હોંગકોંગ અને બેંગકોકમાં સૌથી વધારે જોવા મળી રહી છે. માઈનસ-2 સાઈઝના કેરેટ હીરાનો ભાવ દિવાળી પહેલાં 19થી 35 હજાર રૂપિયા સુધી હતો જે હાલ 22થી 38 હજાર રૂપિયા થઈ ગયો છે. તેવી જ રીતે પ્લસ-11 અને માઈનસ-14 કેરેટના હીરાની ડિમાન્ડ નિકળતાં તેના ભાવમાં પણ વધારો થયો છે. આ હીરાનો કેરેટનો 15 દિવસ પહેલાં ભાવ 18 હજારથી 38 હજાર રૂપિયા સુધી હતો જે હાલ 20થી 40 હજાર રૂપિયા થઈ ગયો છે. જેની ડિમાન્ડ અમેરિકા અને દુબઈની માર્કેટમાં વધુ છે. ખાસ કરીને રફના ભાવ સ્ટેબલ થયા તે અને તૈયાર હીરાના શોર્ટ સપ્લાયને કારણે ડિમાન્ડ વધી હોવાનો હીરા વેપારીઓનો મત છે.
જીજેઈપીસીના રિજિયનોલ ચેરમેન સાવલિયાએ કહ્યું હતું કે, હીરાની માંગમાં વધારો થવો એ માર્કેટમાં સુધારો આવવાના સંકેત છે. હાલ પ્રોડક્શન ઓછું અને માંગ વધારે હોવાને કારણે ડિમાન્ડ વધી રહી છે. બીજી તરફ રફ હીરાના ભાવો સ્થિર થયાં છે જેથી હવે માર્કેટ સ્ટેબલ થયું છે, હવે ધીમે ધીમે ડિમાન્ડમાં સુધારો થતો જશે. સુરત ડાયમંડ એસોસિએશનના પ્રમુખ ખૂંટે કહ્યું હતું કે, છેલ્લાં 2 વર્ષથી માઈનસ ટુ સાઈઝના હીરાની માંગ જ ન હતી, પરંતુ હાલમાં આ હીરામાં ડિમાન્ડ વધી છે. હાલ વિશ્વના અલગ અલગ દેશોમાં આ પ્રકારની ડિમાન્ડ વધી છે. જ્યારે સપ્લાય ઓછો છે, જેના કારણે જે હીરા વેપારીઓ પાસે પતલી સાઈઝના હીરા હતા તેમનો સ્ટોક પણ ખાલી થઈ ગયો છે.
