રશિયા-યુક્રેન યુદ્ધ ટૂંક સમયમાં સમાપ્ત થશે, પુતિન સાથે સારી વાતચીત થઈ : ટ્રમ્પ

અમેરિકી રાષ્ટ્રપતિ ડોનાલ્ડ ટ્રમ્પે શુક્રવારે કહ્યું કે ગુરુવારે તેમણે રશિયન રાષ્ટ્રપતિ વ્લાદિમીર પુતિન સાથે યુક્રેન યુદ્ધ રોકવા અંગે સારી વાતચીત કરી અને કહ્યું કે તેમને આશા છે કે આ યુદ્ધ ખૂબ જ જલ્દી સમાપ્ત થશે. વાતચીત દરમિયાન તેમણે પુતિનને યુક્રેનિયન સૈનિકોના જીવ બચાવવા અપીલ કરી. ટ્રમ્પે તેમના સોશિયલ મીડિયા પ્લેટફોર્મ ટ્રુથ સોશિયલ પર લખ્યું, “રશિયાના રાષ્ટ્રપતિ વ્લાદિમીર પુતિન સાથે અમારી ખૂબ જ સારી વાતચીત થઈ, અને આ ભયંકર યુદ્ધનો અંત લાવવાની ખૂબ જ સારી તક છે.” ટ્રમ્પે વધુમાં લખ્યું છે કે હજારો યુક્રેનિયન સૈનિકો, જેઓ હાલમાં સંપૂર્ણપણે રશિયન સેનાથી ઘેરાયેલા છે, તેઓ ખૂબ જ ખરાબ અને અસુરક્ષિત સ્થિતિમાં છે. મેં રાષ્ટ્રપતિ પુતિનને આ સૈનિકોના જીવ બક્ષવાની અપીલ કરી છે. આ બીજા વિશ્વયુદ્ધ પછી ક્યારેય ન જોયેલો નરસંહાર હશે.
યુએસ એમ્બેસેડર સ્ટીવ વિટકોફે પુતિન સાથે મુલાકાત કરી હતી રોઇટર્સના અહેવાલ મુજબ, ગુરુવારે રાત્રે મોસ્કોમાં યુએસ એમ્બેસેડર સ્ટીવ વિટકોફે રાષ્ટ્રપતિ પુતિન સાથે લાંબી મુલાકાત કરી હતી. ટ્રુથ સોશિયલ પોસ્ટમાં ટ્રમ્પ અને પુતિન વચ્ચે વાતચીત થઈ કે નહીં તે જણાવ્યું નથી. જોકે, ક્રેમલિનના પ્રવક્તા દિમિત્રી પેસ્કોવે જણાવ્યું હતું કે પુતિને મુલાકાત દરમિયાન વિટકોફ દ્વારા ટ્રમ્પને સંદેશ મોકલ્યો હતો. તેમણે એમ પણ કહ્યું કે રશિયા અને અમેરિકા સંયુક્ત રીતે નક્કી કરશે કે તેમના રાષ્ટ્રપતિઓ વચ્ચે ફોન પર વાતચીત ક્યારે થશે.
ગુરુવારે રશિયન રાષ્ટ્રપતિ વ્લાદિમીર પુતિને યુક્રેન સાથે યુદ્ધવિરામ વાટાઘાટો પર પોતાની પહેલી પ્રતિક્રિયા આપી. એક સવાલના જવાબમાં પુતિને કહ્યું કે, રશિયા યુદ્ધવિરામના પ્રસ્તાવો સાથે સંમત છે, પરંતુ તે લાંબા ગાળાની શાંતિ તરફ દોરી જવું જોઈએ અને યુદ્ધના મૂળ કારણોને દૂર કરવા જોઈએ. પુતિને જવાબ આપતા પહેલા યુદ્ધવિરામની ચર્ચા કરવા બદલ યુએસ રાષ્ટ્રપતિ ડોનાલ્ડ ટ્રમ્પનો આભાર માન્યો. તેમણે યુદ્ધના મુદ્દા પર ધ્યાન આપવા બદલ ચીનના રાષ્ટ્રપતિ શી જિનપિંગ અને ભારતના વડાપ્રધાન નરેન્દ્ર મોદી સહિત ઘણા વિશ્વ નેતાઓનો આભાર માન્યો. પુતિને કહ્યું કે યુક્રેન અમેરિકાના દબાણ હેઠળ યુદ્ધવિરામ માટે સંમત થયું છે, જ્યારે વર્તમાન પરિસ્થિતિને જોતાં તેણે પોતે જ અમેરિકા પાસેથી આ પ્રસ્તાવ માંગવો જોઈતો હતો.