પાકિસ્તાને સતત બીજી રાત્રે જમ્મુ-કાશ્મીરના ચાર વિસ્તારોમાં ગોળીબાર કર્યો. આમાં કુપવાડા, બારામુલ્લા, ઉરી અને અખનૂરનો સમાવેશ થાય છે. ભારતીય સેનાએ પણ વળતો જવાબ આપ્યો. જોકે, હજુ સુધી કોઈ જાનહાનિના સમાચાર નથી.
પહેલગામ હુમલા બાદ પાકિસ્તાન સતત યુદ્ધવિરામનું ઉલ્લંઘન કરી રહ્યું છે. ઓપરેશન સિંદૂર પછી, મોટાભાગે રહેણાંક વિસ્તારોને નિશાન બનાવવામાં આવી રહ્યા છે. ગુરુવારે સવારે જમ્મુ-કાશ્મીરના પૂંછ જિલ્લામાંથી પાકિસ્તાન દ્વારા કરવામાં આવેલા ગોળીબારના ફોટા સામે આવ્યા છે. CCTVમાં જોવા મળે છે કે બે લોકો એકબીજા સાથે વાત કરી રહ્યા છે ત્યારે અચાનક તેમની પાછળ એક જોરદાર વિસ્ફોટ થાય છે અને એક ઇમારતનો એક ભાગ ધરાશાયી થાય છે.
ઓપરેશન સિંદૂરના 24 કલાક પછી બુધવાર અને ગુરુવારની મધ્યરાત્રિએ અમૃતસર અને જલંધરમાં વિસ્ફોટોના અવાજો સંભળાયા. અમૃતસરમાં રાત્રે 1.02 થી 1.09 વાગ્યાની વચ્ચે છ વિસ્ફોટો સંભળાયા. જોકે, વિસ્ફોટ કયા કારણોસર થયા તે સ્પષ્ટ નથી. અમૃતસર પોલીસ કમિશનર ગુરપ્રીત સિંહ ભુલ્લરે કહ્યું કે ગભરાવાની કોઈ જરૂર નથી. ગ્રાઉન્ડ ચેક કરાવવામાં આવ્યું છે. કોઈપણ પ્રકારના હુમલાની પુષ્ટિ નથી.
