નર્સિંગના વિદ્યાર્થીને કોસ્ટ ગાર્ડમાં નોકરીની લાલચ આપી .8 લાખ પડાવી લીધા

એલજી હોસ્પિટમલાં નર્સિંગમાં અભ્યાસ કરતા યુવકને ઈન્ડિયન કોસ્ટ ગાર્ડમાં નોકરી અપાવવાના બહાને ગઠિયાએ રૂ.8 લાખ પડાવી લીધા હતા, જેની સામે તેને નકલી એપોઈન્ટમેન્ટ લેટર, ટ્રેનિંગના લેટર પણ મોકલ્યા હતા. આટલું જ નહીં પોલીસ વેરિફિકેશન અને સિવિલમાં મેડિકલ પણ કરાવ્યું હતું. જોકે 1 મહિનામાં નોકરી અપાવવાની વાત કરીને સવા વર્ષ સુધી નોકરી ન આપતા આખરે ગઠિયા વિરુદ્ધ પોલીસે ફરિયાદ કરાઈ હતી.
નરોડા રોડ પર અનિલ સ્ટાર્ચ મિલ સામે આવેલા કાલિકા પાર્કમાં રહેતા શૈલેષભાઈ પટણી (ઉં.46) ડ્રાઇવિંગની નોકરી કરે છે. જ્યારે તેમનો દીકરો ચિરાગ હાલ એલજીમાં નર્સિંગનો અભ્યાસ કરે છે. બે વર્ષ પહેલા શૈલેષભાઈનાં બહેન રેણુકાબહેનના જમાઈ અરુણભાઈ પટણીએ શૈલેશભાઈને કહ્યું હતું કે, તેમના એક મિત્ર છે નરેશભાઈ પરમાર, જે વિસનગરમાં રહે છે અને સરકારી નોકરી અપાવે છે. જોકે ચિરાગને સરકારની નોકરી લેવાની હોવાથી શૈલેશભાઈએ નરેશભાઈ સાથે મીટિંગ કરી હતી, ત્યારે નરેશભાઈએ ચિરાગને ઈન્ડિયન કોસ્ટ ગાર્ડમાં એમટીએસ પોસ્ટ પર નોકરી અપાવવાનું કહી તે માટે રૂ.8 લાખ ખર્ચ થશે તેવી વાત કરી હતી, જેમાં શૈલેશભાઈ અને ચિરાગ સહમત થતા નરેશભાઈને રૂ.2 લાખ ટોકન આપીને ફેબ્રુઆરી 2024માં ચિરાગની નોકરીનું કામ આપ્યંુ હતું.
નરેશભાઈએ એક જ મહિનામાં નોકરીનો એપોઈન્ટમેન્ટ લેટર આવી જશે તેવી વાત કરી હતી. ત્યાર બાદ ધીરે ધીરે કામ થઈ રહ્યું હોવાનું કહીને નરેશભાઈએ પૂરેપૂરા પૈસા લઈ લીધા હતા અને કોસ્ટ ગાર્ડના ઈમેલ પરથી નોકરી માટેના ઓર્ડરનો પોસ્ટના કવરવાળો ફોટો મોકલ્યો હતો, પરંતુ તે ઓર્ડરની કોપી મોકલી ન હતી. જ્યારે નરેશભાઈએ કહ્યું હતું કે, કોસ્ટ ગાર્ડ તરફથી તમને મેલ કરીને નોકરીનો કોલ લેટર મોકલવામાં આવશે. ત્યાર બાદ એમટીએસ વિભાગમાં ટ્રેનિંગનો મેલ કર્યો હતો. ત્યાર બાદ નરેશભાઈએ શૈલેશભાઈને વોટ્સએપથી વાત કરીને કહ્યું હતું કે, ચિરાગનું પોલીસ વેરિફિકેશન સર્ટિફિકેટ અને સિવિલનું મેડિકલ સર્ટિફિકેટ રજૂ કરવું પડશે, જેથી તેમણે તે બંને કરાવી લીધાં હતાં. ત્યાર બાદ 30 એપ્રિલ 2024થી 15 મે 2024 સુધીનો ટ્રેનિંગ માટેનો લેટર પણ મોકલી આપ્યો હતો. ત્યાર બાદ કોઈ કારણસર ટ્રેનિંગ કેન્સલ થઈ હોવાનું કહીને ટ્રેનિંગ માટેનો નવો કોલ લેટર તમને મોકલવામાં આવશે તેવું કહીને ગલ્લાતલ્લા કરતો હતો.
જોકે સવા વર્ષ કરતાં પણ વધારે સમય થઈ ગયો હોવા છતાં ચિરાગને નોકરીનો કોલ લેટર ન મળતા નરેશભાઈ પરમારે છેતરપિંડી કરી હોવાની જાણ થતા શૈલેશભાઈએ શહેર કોટડા પોલીસ સ્ટેશનમાં ફરિયાદ નોંધાવી હતી.