બ્રિટનમાં 16 વર્ષના બાળકો હવે મતદાન કરી શકશે. સરકારે મતદાનની લઘુત્તમ ઉંમર 18થી ઘટાડીને
16 વર્ષ કરવાની જાહેરાત કરી છે. સરકારે આગામી રાષ્ટ્રીય ચૂંટણી પહેલા આ નિર્ણય લીધો છે, જેથી
લોકશાહી ભાગીદારી વધારી શકાય. મધ્ય-ડાબેરી લેબર પાર્ટીએ જુલાઈ 2024માં ચૂંટણી થાય તે પહેલા
યુકે સંસદની ચૂંટણી માટે મતદાનની ઉંમર ઘટાડવાનું વચન આપ્યું હતું. એવામાં હવે બ્રિટનની આ
જાહેરાત બાદ મતદાતાઓની ઉંમરને લઈને દુનિયાભરમાં ચર્ચાઓ શરુ થઈ ગઈ છે.
આ નિર્ણયની સાથે જ, સરકારે વોટર આઈડી સંબંધિત એક નવી વ્યવસ્થા પણ લાગુ કરી છે, જેમાં બેન્ક
કાર્ડ અને વેટરન્સ કાર્ડને પણ માન્યતા આપવામાં આવશે. આનાથી વધુ લોકોને મતદાન પ્રક્રિયામાં
સામેલ થવામાં સરળતા રહેશે.સ્કોટલેન્ડ અને વેલ્સ પહેલાથી જ 16 અને 17 વર્ષના બાળકોને સ્થાનિક
અને પ્રાદેશિક ચૂંટણીઓમાં મતદાન કરવાની મંજૂરી આપે છે. આ ઉપરાંત ઇક્વાડોર, ઑસ્ટ્રિયા અને
બ્રાઝિલ બાદ હવે બ્રિટન પણ મતદાનની ઉંમરમાં ઘટાડો કરનાર દેશોની યાદીમાં જોડાશે.
આ નિર્ણયને બ્રિટીશ સરકારે બ્રિટનના લોકશાહીમાં એક પેઢીમાં થયેલા સૌથી મોટા ફેરફારો પૈકી એક
ગણાવ્યો છે. આ ઉપરાંત મતદાન મથકો પર ઓળખપત્ર તરીકે યુકે દ્વારા આપવામાં આવેલા બેન્ક
કાર્ડનો ઉપયોગ કરવાની મંજૂરી આપવામાં આવશે. તેમજ આ નવા નિર્ણયને લઈને મતદાર ઓળખ
પ્રણાલીમાં જરૂરી ફેરફાર પણ કરવામાં આવશે. 1969માં યુકે દ્વારા મતદાનની ઉંમર 21 થી ઘટાડીને 18
વર્ષ કરવામાં આવી તેના લગભગ છ દાયકા પછી આ ફેરફાર આવ્યો છે. યુકે લેબર પાર્ટીની આગેવાની
હેઠળની સરકાર દલીલ કરે છે કે તેને વધુ ઘટાડીને 16 વર્ષ કરવાથી ઘણા અવરોધો દૂર થશે અને
બ્રિટનના લોકશાહીમાં વધુ લોકોને ભાગ લેવાની તક મળશે તેની ખાતરી થશે.
