દેશમાં 15 ઓગસ્ટના રોજ સ્વતંત્રતા દિવસની ઉજવણી માટે દિલ્હીમાં કડક સુરક્ષા વ્યવસ્થા ગોઠવવામાં આવી રહી છે. જેમાં સ્વતંત્રતા દિવસની સુરક્ષામાં બેદરકારીના પગલે લાલ કિલ્લામાં તૈનાત સાત પોલીસ કર્મીઓને સસ્પેન્ડ કરવામાં આવ્યા છે. લાલ કિલ્લામાં આયોજિત સ્વતંત્રતા દિવસના કાર્યક્રમના પગલે પોલીસ એન સુરક્ષા દળો દ્વારા દરરોજ મોક ડ્રીલ કરવામાં આવી રહી છે. જેમાં પોલીસની એક ટીમે સાદા ડ્રેસમાં બોમ્બ લઈને લાલ કિલ્લામાં દાખલ થઈ હતી. જોકે, ત્યાં ફરજ પર હાજર પોલીસ કર્મીઓ તેની પકડી ના શકયા.
આ અંગે મળતી માહિતી મુજબ દિલ્હી પોલીસની સ્પેશયલ સેલની ટીમ શનિવારે સાદા ડ્રેસમાં ડમી બોમ્બ સાથે લાલ કિલ્લા પરિસરમાં દાખલ થઈ હતી. જયારે લાલ કિલ્લાની સુરક્ષામાં તૈનાત પોલીસ કર્મીઓ આ બોમ્બને પકડી શકયા ન હતા. લાલ કિલ્લાની સુરક્ષાના આટલી મોટી ચૂક પ્રકાશમાં આવી હતી. જેના લીધે આ સાત પોલીસ કર્મીઓ તાત્કાલિક અસરથી સસ્પેન્ડ કરવામાં આવ્યા છે. તેમજ બાકી સુરક્ષા કર્મીઓને સતર્ક રહેવા આદેશ આપ્યા છે.
લાલ કિલ્લામાં ઘુસવાનો પ્રયાસ કરી કરેલા પાંચ બાંગ્લાદેશીની ધરપકડ
આ દરમિયાન લાલ કિલ્લામાં ઘુસવાનો પ્રયાસ કરી કરેલા પાંચ બાંગ્લાદેશી નાગરિકોની પોલીસે ધરપકડ કરી છે. તેમની ઉંમર 20 -25 વર્ષ વચ્ચેની છે. આ બાંગ્લાદેશી દિલ્હીના અલગ અલગ વિસ્તારોમાં કામ કરે છે. પોલીસને તેમની પાસેથી બાંગ્લાદેશના દસ્તાવેજ મળ્યા છે. પોલીસ હાલ તેમની પૂછપરછ કરી રહી છે. પોલીસ તેમનો લાલ કિલ્લામાં પ્રવેશ કરવાનો ઈરાદો જાણવાનો પ્રયાસ કરી રહી છે.
