અમેરિકન પ્રમુખ ડોનાલ્ડ ટ્રમ્પ અને તેમના સૌથી મોટા ટીકાકારોમાંના એક, ન્યૂયોર્કના નવા ચુંટાયેલા મેયર ઝોહરાન મમદાની વચ્ચે શુક્રવારે વ્હાઇટ હાઉસમાં થયેલી મુલાકાત અપેક્ષાઓથી તદ્દન વિપરીત અને અત્યંત સકારાત્મક રહી. જે ટ્રમ્પે અગાઉ મમદાનીને જાહેરમાં ‘વામપંથી પાગલ’ જેવા ઉપનામો આપ્યા હતા, તેમણે જ ઓવલ ઓફિસમાં મમદાનીનું ઉષ્માભર્યું સ્વાગત કર્યું અને અનેક મુદ્દાઓ પર સહમતિ પણ દર્શાવી.બીજી તરફ, મમદાનીએ પણ બેઠક બાદ સકારાત્મક પ્રતિક્રિયા આપતા કહ્યું, “હું રાષ્ટ્રપતિની એ વાત માટે પ્રશંસા કરું છું કે અમારી મીટિંગમાં મતભેદો પર નહીં, પરંતુ ન્યૂયોર્કના લોકોના જીવનને કેવી રીતે બહેતર બનાવી શકાય તેના પર ચર્ચા થઈ.” આ મુલાકાત દરમિયાન સૌથી આશ્ચર્યજનક દ્રશ્ય ત્યારે જોવા મળ્યું જ્યારે રાષ્ટ્રપતિ ટ્રમ્પ પોતે જ મમદાનીનો પત્રકારો સામે બચાવ કરતા જોવા મળ્યા.
અગાઉ મમદાનીના ચૂંટાવા પર ન્યૂયોર્કનું ફંડિંગ રોકી દેવાની ધમકી આપનાર ડોનાલ્ડ ટ્રમ્પે હવે કહ્યું છે કે તેઓ ન્યૂયોર્કને એક મજબૂત અને સુરક્ષિત શહેર બનાવવામાં નવા મેયરની સંપૂર્ણ મદદ કરશે. ટ્રમ્પે કહ્યું, “અમે મમદાનીની મદદ કરીશું, જેથી દરેકનું સ્વપ્ન સાકાર થઈ શકે, એક મજબૂત અને સુરક્ષિત ન્યૂયોર્કનું નિર્માણ થઈ શકે.”
પત્રકારે મમદાનીને પૂછ્યું, “શું તમે ટ્રમ્પને સરમુખત્યાર માનો છો?” ટ્રમ્પે કહ્યું, “હા કહી દ્યો.”
મેયર ઝોહરાન મમદાનીએ ઓવલ ઓફિસમાં રાષ્ટ્રપતિ ડોનાલ્ડ ટ્રમ્પ સાથે મુલાકાત કરી. મેયરની ચૂંટણી પછી બંને નેતાઓ વચ્ચે આ પહેલી મુલાકાત હતી. આ મુલાકાત દરમિયાન એક રસપ્રદ ઘટના બની. રાષ્ટ્રપતિ ટ્રમ્પની સામે એક પત્રકારે મમદાનીને પૂછ્યું, “શું તમે ટ્રમ્પને સરમુખત્યાર માનો છો?” મમદાનીએ બોલવાનું શરૂ કરતાં જ ટ્રમ્પે તેમને અટકાવીને કહ્યું, “હા, સમજાવવાની કોઈ જરૂર નથી.” આ ઘટનાનો એક વીડિયો સોશિયલ મીડિયા પર સામે આવ્યો છે અને તેને વ્યાપકપણે જોવામાં આવી રહ્યો છે.
