સુરત શહેરના લિંબાયત વિસ્તારમાં પતંગ પકડવા ગયેલા ૧૨ વર્ષના કિશોર પર દીવાલ પડતાં મોત થયું હતું. મૃતક ત્રણ ભાઈ-બહેનમાં સૌથી નાનો હતો. તેમજ એક મહિના પહેલા જ નવી સ્કૂલમાં એડમિશન લીધું હતું. ઘટનાના પગલે સમગ્ર વિસ્તારમાં શોકનું મોજું ફરી વળ્યું હતું.
સુરતના લિંબાયત વિસ્તારમાં રહેતો વિદ્યાર્થી પતંગ પકડવા માટે ગયો હતો. આ સમયે અચાનક એક જર્જરીત દીવાલ તૂટી પડી હતી જેની નીચે તે દબાઈ ગયો હતો. આ ઘટનાની જાણ થતાં જ તેના પિતા દોડી આવ્યા હતા અને આસપાસના લોકોની મદદથી બહાર કાઢ્યો હતો. જે બાદ તેને સારવાર માટે ખસેડવામાં આવ્યો હતો.
હોસ્પિટલ પહોંચ્યા બાદ ફરજ પરના તબીબીઓ તેને તપાસીને મૃત જાહેર કર્યો હતો. છાતીના ભાગે ઈજા થવાથી તેનું ઘટના સ્થળે અથવા હોસ્પિટલ પહોંચતા પહેલા મૃત્યુ થયું હતું. મૃતકના વિદ્યાર્થીના પિતાના કહેવા પ્રમાણે, પહેલા તે મારૂતિનગર ઉર્દૂ સ્કૂલમાં ભણતો હતો અને ૨૦ દિવસ પહેલા જ નવી સ્કૂલમાં એડમિશન લીધું હતું.
