મહુવાના મોડીરાત્રે સ્ટ્રીટ લાઈટના અજવાળે જુગાર રમતા ત્રણ મહિલા સહીત 8 ઝડપાયા ભાવનગર એલસીબીનો દરોડો,70 હજારની રોકડ અને 6 મોબાઈલ મળી 1.41 લાખનો મુદ્દામાલ જપ્ત કરાયો

ભાવનગર,તા.5
મહુવા શહેરના લાતીબજાર વિસ્તારમાં આવેલા વાધરકુવા ચોક ખાતે જાહેરમાં ચાલતા તીનપત્તીના જુગાર પર ભાવનગર લોકલ ક્રાઇમ બ્રાંચ (એલસીબી) દ્વારા દરોડો પાડી 5 પુરુષો અને 3 મહિલાઓ સહિત કુલ 8 શખ્સોને ઝડપી પાડવામાં આવ્યા હતા. પોલીસે તેમની પાસેથી 70.100ની રોકડ રકમ, ગંજીપત્તાના પાના અને મોબાઇલ ફોન સહિત કુલ રૂ.1,41,100નો મુદ્દામાલ કબજે કર્યો હતો.
આ અંગે પ્રાપ્ત વિગતો અનુસાર, એલસીબીની ટીમ રાત્રે મહુવા ડિવિઝન વિસ્તારમાં પ્રોહિબિશન અને જુગાર વિરોધી પેટ્રોલિંગમાં હતી. દરમિયાન બાતમી મળી હતી કે લાતીબજારના વાધરકુવા ચોક ખાતે કેટલાક લોકો સ્ટ્રીટલાઇટના અજવાળામાં રોકડ રકમ સાથે તીનપત્તીનો જુગાર રમી રહ્યા છે. બાતમીના આધારે પોલીસે બે પંચોની હાજરીમાં રાત્રે આશરે 2:10 વાગ્યે દરોડો પાડ્યો હતો.જ્યાં સ્થળ પરથી સંજયભાઈ સાંખટ, રાહુલભાઈ વાઘેલા, ચંદુભાઈ બાંભણીયા, ભાવેશભાઈ મકવાણા, લલીતભાઈ ભીલ તેમજ મનીષબેન બારૈયા, જયાબેન મકવાણા અને મંગુબેન બારૈયાને જુગાર રમતા ઝડપવામાં આવ્યા હતા.
પોલીસે આરોપીઓ પાસેથી કુલ રૂ. 70,100 રોકડા, 52 ગંજીપત્તાના પાના અને રૂ. 71,000 કિંમતના 6 મોબાઇલ ફોન કબજે કર્યા હતા. સમગ્ર મુદ્દામાલ સાથે કુલ રૂ. 1,41,100નો જથ્થો જપ્ત કરવામાં આવ્યો છે. પોલીસે જુગારધારા કલમ-12 હેઠળ ગુનો નોંધી વધુ તપાસ હાથ ધરી છે. કેટલાક આરોપીઓની સ્થળ પર અટકાયત કરવામાં આવી હતી જ્યારે મહિલાઓને કાયદેસરની કાર્યવાહી માટે પોલીસ સ્ટેશન ખાતે હાજર રહેવા સૂચના આપવામાં આવી હતી.