તળાજાના બોરડથી બોરડી ગામે ધારાસભ્યની ગ્રાન્ટમાંથી તાજેતરમાં જ બોરડા બસ સ્ટેન્ડથી પ્લોટ વિસ્તાર સુધી આર.સી.સી. અને ડામર રોડ બનાવવામાં આવ્યો હતો. પરંતુ તંત્ર અને કોન્ટ્રાક્ટરની અણઆવડતને કારણે પ્લોટ વિસ્તારમાં રોડનો ઢાળ ઉંધો રાખવામાં આવતા ગંભીર સમસ્યા સર્જાઈ છે.
અગાઉ ખેતરો અને રસ્તાનું વરસાદી પાણી સીધું નદીમાં વહી જતું હતું, પરંતુ હવે ઉંધા ઢાળ અને ઉંચા-નીચા રોડને કારણે પાણી આગળ જવાના બદલે પાછળ ધકેલાઈ રહ્યું છે. પરિણામે પ્લોટ વિસ્તારના આર.સી.સી. રોડ પર ગોઠણ સમા ગંદા પાણી ભરાઈ રહે છે. સતત પાણી ભરાયેલું રહેવાથી માખી-મચ્છરનો ઉપદ્રવ વધ્યો છે અને સ્થાનિક વેપારીઓ, રહીશો તેમજ રાહદારીઓના આરોગ્ય પર ખતરો મંડરાઈ રહ્યો છે.
ભગુડા, બગદાણા અને ગોપનાથ જેવા યાત્રાધામોને જોડતો અને ૪૦ જેટલા ગામો માટે શોર્ટકટ સમાન આ રોડ પરથી રોજના હજારો લોકો પસાર થાય છે. સ્થાનિકોના જણાવ્યા મુજબ, બે મહિના પહેલા કામગીરી વખતે જ ઢાળ બાબતે તંત્રનું ધ્યાન દોરવામાં આવ્યું હતું, છતાં કોઈ પગલાં ન લેવાયા. ગ્રામજનો હવે તાત્કાલિક આ ઢાળ સુધારી સમસ્યાનો કાયમી ઉકેલ લાવવાની માંગ કરી રહ્યા છે.
