મહુવામાં માર્કેટિંગ યાર્ડ પાછળથી જુગાર રમતા ૬ શખસો ઝડપાયા

ભાવનગર જિલ્લાના મહુવા ટાઉન પોલીસ મથકના સ્ટાફે રાત્રિ પેટ્રોલીંગ દરમિયાન ખાનગી બાતમીના આધારે કાર્યવાહી કરીને જાહેરમાં જુગાર રમતા ૬ શખસોને રોકડ રકમ અને ગંજીપત્તા સાથે ઝડપી લીધા છે.
મળતી માહિતી મુજબ, મહુવા પોલીસની ટીમ નેસવડ ચોકડી પાસે પેટ્રોલીંગમાં હતી તે દરમિયાન માર્કેટિંગ યાર્ડની પાછળ આવેલા ખોડીયારનગરમાં સ્ટ્રીટ લાઈટના અંજવાળે કેટલાક ઇસમો ગંજીપત્તા વડે તીન પત્તીનો જુગાર રમી રહ્યા હોવાની બાતમી મળી હતી. પોલીસે તાત્કાલિક દરોડો પાડીને સ્થળ પરથી ભોળાભાઈ જોળીયા, મુન્નાભાઈ મકવાણા, કાનાભાઈ ચાવડા, હરેશભાઈ ભાલીયા, લખમણભાઈ બારૈયા અને ભાવેશભાઈ બાંભણીયાને પકડી પાડ્યા હતા. પોલીસે જુગારના પટમાંથી તથા પકડાયેલા ઇસમો પાસેથી કૂલ ₹૧૦,૨૦૦ ની રોકડ રકમ અને ગંજીપત્તા જપ્ત કર્યા છે. આ અંગે અનામત પોલીસ કોન્સ્ટેબલ જીતેન્દ્રભાઈ કાતરિયાની ફરિયાદના આધારે મહુવા પોલીસે તમામ ૬ આરોપીઓ વિરુદ્ધ જુગાર અટકાયતી અધિનિયમની કલમ ૧૨ હેઠળ ગુનો નોંધી આગળની કાર્યવાહી હાથ ધરી છે.