ઓકટોબરના બીજા પખવાડિયા માટે કેન્દ્રએ ૧૪ લાખ ટન ખાંડ કવોટા છૂટો કર્યો છે. દશેરા તથા દિવાળીના તહેવારને ધ્યાનમાં રાખી સરકારે બે દિવસ વહેલા કવોટા જાહેર કર્યો છે, જેથી ખાંડનો પૂરતો પૂરવઠો જળવાઈ રહે એમ અન્ન તથા જાહેર વિતરણ વિભાગના સુત્રોએ જણાવ્યું હતું.આ ઉપરાંત ખાંડના આયાતકારોને વધુ બે લાખ ટનની ફાળવણી કરવામાં આવી છે.
છેલ્લા દસ દિવસમાં ખાંડના ક્વિન્ટલ દીઠ ભાવમાં રૂપિયા ૧૦૦૦નો વધારો થયો છે. સપ્ટેમ્બર માટે સરકારે ૨૬.૫૦ લાખ ટન અને સંપૂર્ણ ઓકટોબર માટે ૩૦ લાખ ટન ખાંડ છૂટી કરવામાં આવી છે. અગાઉ સરકાર મિલો માટે દર મહિને ખાંડ કવોટાની ફાળવણી કરતી હતી જે સપ્ટેમ્બરથી બદલીને દર પખવાડિયે જાહેર કરવાનું શરૂ કરાયું છે. ખાંડના રિટેલ ભાવ હાલમાં રૂપિયા ૫૫થી ૬૦ની વચ્ચે બોલાઈ રહ્યા છે. તહેવારો દરમિયાન ડિલરો દ્વારા ખાંડની સંગ્રહખોરી ટાળવા સરકારે ખાંડમાં સ્ટોક લિમિટ જેવા પગલાં હાથ ધર્યા છ. નવા નોટિફિકેશન પ્રમાણે ડિલર મહત્તમ ૧૦૦૦ ક્વિન્ટલ ખાંડનો સ્ટોક રાખી શકશે અને તે પણ પંદર દિવસ સુધી. નવી મર્યાદા ૧૫ ઓકટોબરથી ૩૦ નવેમ્બર સુધી અમલી રહેશે.
આ અગાઉ ઓગસ્ટમાં ૪૦૦૦ ક્વિન્ટલ સ્ટોક મર્યાદા લાગુ કરવામાં આવી હતી. દરમિયાન ટેરિફ રેટ કવોટા હેઠળ ૨૦૨૬-૨૭ માટે યુરોપિયન યુનિયનમાં ૫૮૪૧ ટન ખાંડની નિકાસની સરકાર દ્વારા છૂટ આપવામાં આવી છે.આ કવોન્ટિટી ઓકટોબર, ૨૦૨૬થી સપ્ટેમ્બર, ૨૦૨૭ની વચ્ચે નિકાસ થઈ શકશે.
નવા નિયમ પ્રમાણે દરેક મિલોએ તેમને ફાળવાયેલા પખવાડિક કવોટામાંથી ઓછામાં ઓછી ૪૦ ટકા ખાંડ પખવાડિયાના પ્રથમ સપ્તાહમાં અને બાકીની ખાંડ બીજા સપ્તાહમાં વેચી દેવાની રહેશે. દર પખવાડિયે કવોટા જારી કરવાથી ખાંડની સંગ્રહખોરી અટકાવવામાં મદદ મળશે એમ અન્ન મંત્રાલયના સુત્રોએ અગાઉ જણાવ્યું હતું.
