લખપત સરહદે પાકિસ્તાની બોટ સાથે એક ઘૂસણખોર ઝડપાયો

કચ્છના સરહદી અને અત્યંત સંવેદનશીલ લખપતના ક્રીક વિસ્તારમાંથી એક પાકિસ્તાની ઘૂસણખોર બોટ સાથે ઝડપાયા બાદ, સુરક્ષા દળોને વધુ એક બોટ મળી આવી હતી. સીમા સુરક્ષા દળ દ્વારા હાથ ધરવામાં આવેલા સઘન સર્ચ ઓપરેશન દરમિયાન ક્રીક વિસ્તારમાંથી 7 વર્ષીય એક નધણિયાતું પાકિસ્તાની બાળક મળી આવતાં ભારે ચકચાર મચી ગઈ છે.
પ્રાપ્ત વિગતો અનુસાર, ગત શુક્રવારે લખપતના ક્રીક વિસ્તારમાં સઘન પેટ્રોલિંગ દરમિયાન બીએસએફે એક પાકિસ્તાની ઘૂસણખોર જુમન અહેમદને તેની બોટ સાથે ઝડપી પાડ્યો હતો. આ શખ્સની પ્રાથમિક તપાસમાં તેની પાસેથી કોઈ આપત્તિજનક સામગ્રી મળી ન હતી. આ ઘટના બાદ બીએસએફ દ્વારા સરહદી પટ્ટી પર ઓપરેશન વધુ તેજ કરવામાં આવ્યું હતું. સર્ચ ઓપરેશન દરમિયાન પાકિસ્તાની સરહદ તરફથી આવેલી અન્ય એક શંકાસ્પદ બોટ છોડીને માછીમારો ક્રીકના પ્રવાહ કે સામેપાર નાસી છૂટવામાં સફળ રહ્યા હતા.
જ્યારે સુરક્ષા દળની ટુકડીએ આ લાવારિસ બોટ અને આસપાસના વિસ્તારમાં સઘન તલાશી અભિયાન ચલાવ્યું, ત્યારે તેમાંથી આશરે સાત વર્ષની વયનું એક પાકિસ્તાની બાળક મળી આવ્યું હતું. બીએસએફના જવાનોએ માનવતાવાદી અભિગમ દાખવીને આ માસૂમ બાળકને પોતાની કસ્ટડીમાં સુરક્ષિત રાખ્યું છે. ક્રીક વિસ્તારમાંથી અગાઉ ઘૂસણખોર અને હવે નાની વયનું બાળક મળી આવતા સુરક્ષા એજન્સીઓ અને ગુપ્તચર વિભાગ સફાળા જાગી ગયા છે. આ મામલે બાળક અહીં કેવી રીતે પહોંચ્યું, તેની સાથે અન્ય કોણ લોકો હતા અને આ માછીમારો પાકિસ્તાનથી કયા હેતુસર આવ્યા હતા તે અંગે બીએસએફ અને અન્ય સુરક્ષા એજન્સીઓ દ્વારા ઊંડાણપૂર્વક તપાસ અને પૂછપરછ હાથ ધરવામાં આવી છે.