ચક્રવાત અર્નબના પગલે સાઉથ કોસ્ટ રેલવે 53 ટ્રેનો કેન્સલ,આંધ્ર પ્રદેશ અને ઓડિશામાં એલર્ટ

બંગાળની ખાડીમાં સર્જાયેલું ચક્રવાત વધુ તીવ્ર બની રહ્યું છે. ચક્રવાત અર્નબને ધ્યાનમાં રાખીને ભારતીય રેલવે દ્વારા પણ તકેદારી રાખવામાં આવી રહી છે. આ અંગે ભારતીય રેલવેના ‘સાઉથ કોસ્ટ રેલવે’ ઝોને કેટલીક ટ્રેનો રદ કરી છે. સાઉથ કોસ્ટ રેલવેએ કુલ 53 લોકલ અને એક્સપ્રેસ ટ્રેનો રદ કરવાની જાહેરાત કરી છે. જે 27 અને 28 ઓક્ટોબરે રવાના થવાની હતી.
આ ઉપરાંત સાઉથ કોસ્ટ રેલવેના જનરલ મેનેજર સંદીપ માથુરે અર્નબ ચક્રવાતને કારણે ભારે વરસાદ અને તેજ પવન આવવાની શક્યતાને ધ્યાનમાં રાખીને સુરક્ષા ઉપાયો, કટોકટીની સ્થિતિ માટેની તૈયારીઓ અને મુસાફરોની મદદ માટે કરવામાં આવેલી વ્યવસ્થાઓની સમીક્ષા કરી હતી. સાઉથ કોસ્ટ રેલ્વેના ઝોનલ મુખ્યાલય ખાતે ચોવીસ કલાક કાર્યરત ‘વોર રૂમ’ સ્થાપિત કરવામાં આવ્યો છે. આ સંદર્ભમાં, ચારેય ડિવિઝનના ડિવિઝનલ રેલવે મેનેજરો અને વિવિધ વિભાગોના મુખ્ય વડાઓ સાથે એક સમીક્ષા બેઠક યોજવામાં આવી હતી.જ્યારે સાઉથ કોસ્ટ રેલવેએ સંવેદનશીલ રેલવે પુલો, પાટા, યાર્ડ અને સિગ્નલિંગ સિસ્ટમ્સ પર ચોવીસે કલાક દેખરેખ વધારી દીધી છે. પાણી ભરાઈ જવાની સમસ્યાને રોકવા માટે, પાણીના નિકાલની ચેનલો અને ગટરોમાંથી કાંપ, વનસ્પતિ અને કચરો સાફ કરવા પર વિશેષ ધ્યાન આપવામાં આવી રહ્યું છે. સંવેદનશીલ સ્થળોએ પેટ્રોલિંગ કરનારા કર્મચારીઓ અને ચોકીદારોને તૈનાત કરવામાં આવ્યા છે. તેમજ પાટાના તાત્કાલિક સમારકામ માટે જરૂરી સામગ્રીનો પૂરતો જથ્થો ઉપલબ્ધ રાખવામાં આવ્યો છે.
આ ઉપરાંત જનરલ મેનેજરે અધિકારીઓને રાજ્ય સરકારના સત્તાવાળાઓ સાથે સંકલન જાળવી રાખવા અને હવામાન વિભાગ દ્વારા જાહેર કરવામાં આવતી હવામાન સંબંધિત ચેતવણીઓ પર સતત નજર રાખવા સૂચના આપી છે. કટોકટીના સમયે ત્વરિત કાર્યવાહી અને સંકલન સુનિશ્ચિત કરવા માટે સાઉથ કોસ્ટ રેલવેના ઝોનલ અને ડિવિઝનલ મુખ્યાલયોમાં ‘વોર રૂમ’ સ્થાપિત કરવામાં આવ્યા છે. મુસાફરોની સહાય અને સુરક્ષા માટેની વ્યવસ્થાઓ પણ વધુ મજબૂત કરવામાં આવી છે.
આંધ્ર, ઓડિશાના દરિયાકાંઠાના વિસ્તારમાં ચિંતાનો માહોલ
બંગાળની ખાડીમાં સર્જાયેલા ચક્રવાત અર્નબ મુદ્દે આંધ્ર પ્રદેશ અને ઓડિશાના દરિયાકાંઠાના વિસ્તારમાં ચિંતા વધી છે. આ ચક્રવાત 28 ઑક્ટોબરના રોજ વિશાખાપટ્ટનમ નજીક ટકરાય તેવી શક્યતા છે. આ દરમિયાન ભારે વરસાદ અને પવનના જોખમોને ધ્યાનમાં રાખીને સરકારે તૈયારીઓ સઘન બનાવી દીધી છે અને સંવેદનશીલ જિલ્લાઓમાં અધિકારીઓને તૈનાત કરવામાં આવ્યા છે.