દિલ્હીમાં સ્થિત ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ (AIIMS)નું સર્વર સતત છઠ્ઠા દિવસે પણ ડાઉન રહ્યું હતું. જેના કારણે દર્દીઓને અનેક સમસ્યાઓનો સામનો કરવો પડી રહ્યો છે. તે જ સમયે, સમાચાર આવી રહ્યા છે કે સર્વર હાઇજેક કરનારા હેકર્સે ક્રિપ્ટોકરન્સીમાં 200 કરોડ રૂપિયાની માંગણી કરી છે. કહેવામાં આવી રહ્યું છે કે હેકર્સે આ ડિમાન્ડ મેલ દ્વારા AIIMSને મોકલી છે. જો તેમની માંગ નહીં સંતોષાય તો તેઓ સર્વરને ઠીક નહીં કરે અને સર્વર ડાઉન રહેશે તેવી ચીમકી પણ આપી હતી.
દિલ્હી પોલીસે આ મામલાની તપાસ શરૂ કરી દીધી છે. પોલીસ લિંક સાથે લિંક ઉમેરીને હેકર્સ સુધી પહોંચવાનો પ્રયાસ કરી રહી છે. આ સાથે પોલીસ ધમકીભર્યા મેઈલના આઈપી એડ્રેસને પણ ટ્રેક કરવાનો પ્રયાસ કરી રહી છે. સાયબર સિક્યોરિટી એટેકના ભય વચ્ચે તમામ ઈમરજન્સી અને સામાન્ય સેવાઓ, લેબોરેટરી વગેરે કામ પેન અને કાગળની મદદથી કરવામાં આવી રહ્યા છે. સત્તાવાર સૂત્રોએ જણાવ્યું કે ભારતીય કોમ્પ્યુટર ઇમરજન્સી રિસ્પોન્સ ટીમ, દિલ્હી પોલીસ અને ગૃહ મંત્રાલયના પ્રતિનિધિઓ આ મામલે સતત કામ કરી રહ્યા છે. તેમણે કહ્યું કે રાષ્ટ્રીય તપાસ એજન્સી (NIA) પણ આ તપાસમાં સામેલ થઈ.
ઈ-હોસ્પિટલનું સર્વર ડાઉન હોવાને કારણે ઓપીડી સહિતની અનેક સેવાઓને માઠી અસર થઈ છે. વાસ્તવમાં, સાયબર હુમલા બાદ તેને હેક કરનારાઓએ 200 કરોડની ક્રિપ્ટોકરન્સીની માંગણી કરી છે. છેલ્લા કેટલાક દિવસોથી ઘણા સમાચારો હેડલાઇન્સમાં છે કે ક્રિપ્ટોકરન્સી નેટવર્ક હેક કરીને કરોડો રૂપિયાની ઉચાપત કરવામાં આવી છે.
