ભારતીય ટીમના મેચોનું પ્રસારણ તેમજ આઈપીએલના માધ્યમથી દર વર્ષે કરોડો રૂપિયાની કમાણી કરનારા ભારતીય ક્રિકેટ કંટ્રોલ બોર્ડને મોટો ચૂનો લાગવાનો છે. આ નુકસાન ઘરેલું મેચોના પ્રસારણને કારણે થઈ શકે છે. સ્ટાર ઈન્ડિયાએ બીસીસીઆઈ પાસે પ્રસારણના ડ્રાફ્ટમાં 130 કરોડ રૂપિયાની છૂટ માંગી છે. આ રીતે જર્સી સ્પોન્સરથી બહાર થઈ ચૂકેલું બાયઝૂસ ઈચ્છે છે કે બોર્ડ અત્યારે સમજૂતિ હેઠળ તેની 140 કરોડ રૂપિયાની બેન્ક ગેરંટી પરત કરી દે. બીસીસીઆઈના ટોચના અધિકારીઓએ આ અંગે તાત્કાલિક બેઠક બોલાવી હતી પરંતુ તેમાં કોઈ જ નિવેડો લાવી શકાયો નહોતો.
બાયઝૂસે નવેમ્બરમાં બીસીસીઆઈને જાણ કરી દીધી હતી કે, તે ભારતીય ક્રિકેટ ટીમના જર્સી સ્પોન્સર તરીકે હટી જવા માંગે છે. જો કે બોર્ડે બાયઝૂસને ઓછામાં ઓછા માર્ચ-2023 સુધી યથાવત રહેવા માટે કહ્યું હતું. બાયઝૂસે જૂનમાં અંદાજે 35 મિલિયન ડોલર (અંદાજે ત્રણ અબજ રૂપિયા) સાથે જર્સી સ્પોન્સર સમજૂતિને નવેમ્બર-2023 સુધી વધારી દીધી હતી. જેમાં બીસીસીઆઈને 140 કરોડ રૂપિયા બેન્ક ગેરંટીના માધ્યમથી ચૂકવી દેવાના છે અને બાકીના 160 કરોડ રૂપિયા હપ્તે હપ્તે ચૂકવવામાં આવશે. બીસીસીઆઈના એક સૂત્રએ કહ્યું કે આ બેઠકમાં માત્ર બાયઝૂસ અને સ્ટાર ઈન્ડિયાના મુદ્દે ચર્ચા થઈ હતી જે એક કલાક સુધી ચાલી હતી.
