ગુજરાતમાં સૌરાષ્ટ્રમાં શુક્રવારે બપોર બાદ ફરી કમોસમી વરસાદ શરૂ થયો હતો. રાજકોટ, ભાવનગર, દેવભૂમિ દ્વારકા જિલ્લાના ગ્રામ્ય વિસ્તારમાં સતત માવઠું રહ્યું છે અને એને કારણે ખેડૂતોની ચિંતા વધી છે. ધોરાજી, જસદણ, ખંભાળિયા, ભાવનગર વલ્લભીપુરમાં વરસાદ આવ્યો હતો.
રાજકોટ જિલ્લાના ધોરાજીમાં શુક્રવારે બપોર બાદ અચાનક વાતાવરણમાં પલટો આવ્યો હતો અને આકાશ કાળાં ડીબાંગ વાદળો ઘેરાયાં હતા. ભારે પવન અને વાવાઝોડા જેવો માહોલ જોવા મળ્યો હતો. ધોરાજી શહેરમાં ધીમે ધારે વરસાદ પડ્યો હતો. માવઠાને કારણે જણસીમાં નુકસાન થવાની ભીતિથી ખેડૂતો ચિંતિત બન્યા છે. ભાવનગર જિલ્લાના વલ્લભીપુર પંથકમાં ઉનાળામાં વરસાદી માહોલ જામ્યો હતો. તાલુકામાં બપોર બાદ વાતાવરણ બદલાયું હતું અને વરસાદી માહોલ સર્જાયો હતો. વલ્લભીપુર તાલુકાના નવાગામ, લોલિયાણા, કાળાતળાવ, દુદાધાર, ખેતાટીંબી, કંથારિયા સહિતનાં ગામડાંમાં ધોધમાર કમોસમી વરસાદ વરસ્યો હતો.
રાજકોટ જિલ્લાના જસદણ શહેર અને ગ્રામ્ય વિસ્તારોમાં ભારે પવન સાથે ધોધમાર વરસાદ પડ્યો હતો. જસદણ શહેરના રોડ-રસ્તા પર નદીઓ વહેતી હોય એવાં દૃશ્યો સર્જાયાં હતાં. જસદણ, આટકોટ, દેવપરા, વીનગરમાં પવન સાથે ધોધમાર વરસાદ પડ્યો હતો. માવઠાના લીધે ખેતરોમાં ઉનાળુ બાજરી, તલ સહિત પાકને નુકસાન થયું છે. દેવભૂમિ દ્વારકા જિલ્લામાં સતત સાતમા દિવસે કમોસમી વરસાદ પડ્યો હતો. જિલ્લાના નવી ફોટ, કેશોદ, વિંજલપર સહિતના ગ્રામ્ય વિસ્તારમાં તોફાની પવન સાથે વરસાદ પડ્યો હતો.
