PM મોદી હાલ USAના પ્રવાસે છે. આ દરમિયાન જો બાયડન પ્રશાસન ભારતીયો માટે યુનાઇટેડ સ્ટેટ્સમાં રહેવા અને કામ કરવાનું સરળ બનાવવા માટે એક મહત્વપૂર્ણ યોજના પર કામ કરી રહ્યું છે. બાયડન વહીવટીતંત્ર આ અઠવાડિયે વડાપ્રધાન નરેન્દ્ર મોદીની રાજ્ય મુલાકાતનો ઉપયોગ ભારતીયોને વિઝા નિયમો હળવા કરીને દેશમાં પ્રવેશવા અથવા રહેવામાં મદદ કરવા માટે કરી શકે છે.
મીડિયા અહેવાલો માનીએ તો વિદેશ વિભાગતરત જ જાહેરાત કરી શકે છે કે, કેટલાક ભારતીય અને અન્ય વિદેશી કામદારો વિદેશ પ્રવાસ કર્યા વિના યુએસમાં H-1B વિઝા રિન્યૂ કરી શકશે. આ એક પાયલોટ પ્રોજેક્ટ હશે જેને આગામી વર્ષોમાં વિસ્તારવામાં આવી શકે છે. અત્યાર સુધીમાં યુએસ H1-B વિઝાના સૌથી વધુ સક્રિય વપરાશકર્તાઓ ભારતીય નાગરિકો છે.
નાણાકીય વર્ષ 2022માં લગભગ 442000 H1-B વિઝાનો ઉપયોગ કર્યો, જેમાંથી 73% ભારતીય નાગરિકો હતા. અન્ય યુએસ અધિકારીએ કહ્યું, ‘અમે બધા ઓળખીએ છીએ કે અમારા લોકોની ગતિશીલતા અમારા માટે એક મહાન સંપત્તિ છે અને તેથી અમે તેમને બહુપક્ષીય રીતે સુવિધાઓ પ્રદાન કરવાનું લક્ષ્ય રાખ્યું છે. સ્ટેટ ડિપાર્ટમેન્ટ પહેલેથી જ વસ્તુઓને ફેરવવા માટે સર્જનાત્મક રીતો શોધવા માટે ખૂબ જ સખત મહેનત કરી રહ્યું છે.
યુએસ સ્ટેટ ડિપાર્ટમેન્ટના પ્રવક્તાએ કયા પ્રકારના વિઝા પાત્ર હશે અથવા પાયલોટ પ્રોજેક્ટના લોન્ચના સમય વિશેના પ્રશ્નો પર ટિપ્પણી કરવાનો ઇનકાર કર્યો હતો. કહ્યું હતું કે, યોજનામાં ફેરફારો થઈ શકે છે અને જ્યાં સુધી તેની જાહેરાત કરવામાં ન આવે ત્યાં સુધી તેને અંતિમ સ્વરૂપ આપવામાં આવશે નહીં.
નોંધનીય છે કે, દર વર્ષે યુએસ સરકાર કુશળ વિદેશી કામદારોની શોધ કરતી કંપનીઓને 65,000 H-1B વિઝા ઉપલબ્ધ કરાવે છે. એડવાન્સ ડિગ્રી ધરાવતા કામદારો માટે વધારાના 20,000 વિઝા પણ પ્રદાન કરે છે. આ વિઝા 3 વર્ષ માટે માન્ય છે અને બીજા ત્રણ વર્ષ માટે રિન્યુ કરી શકાય છે. યુએસ સરકારના ડેટા અનુસાર તાજેતરના વર્ષોમાં સૌથી વધુ H-1B કામદારોનો ઉપયોગ કરતી કંપનીઓમાં ભારત સ્થિત ઇન્ફોસિસ અને ટાટા કન્સલ્ટન્સી સર્વિસિસ તેમજ યુએસમાં એમેઝોન, આલ્ફાબેટ અને મેટાનો સમાવેશ થાય છે.
