બોલિવૂડ સુપરસ્ટાર કિંગ ખાન શાહરૂખ ખાને આ વર્ષે બોલિવૂડ ફિલ્મ ‘પઠાણ’થી 4 વર્ષ બાદ જોરદાર વાપસી કરી છે. આ ફિલ્મે ન માત્ર જોરદાર કમાણી કરી છે પરંતુ બોક્સ ઓફિસ પર ઘણા રેકોર્ડ પણ બનાવ્યા છે. તે શાહરૂખ ખાનની સૌથી વધુ કમાણી કરનારી ફિલ્મ બંને બહાર આવી છે. ત્યારે હવે આ ફિલ્મ જાપાનમાં રિલીઝ થવા જઈ રહી છે. જાપાનમાં ફિલ્મની રિલીઝ ડેટ નક્કી થઈ ચુકી છે.
1 સપ્ટેમ્બરે રિલીઝ થશે
જાપાનના સિનેમાઘરોમાં 1 સપ્ટેમ્બર 2023ના રોજ સબટાઈટલ વર્ઝન સાથે આ ફિલ્મ રિલીઝ થવા જઈ રહી છે. આ ફિલ્મમાં જોન અબ્રાહમ અને દીપિકા પાદુકોણ પણ છે. વૈશ્વિક બોક્સ ઓફિસ પર રૂ. 1,050 કરોડથી વધુની કમાણી સાથે, પઠાણ હિન્દી સિનેમાના ઇતિહાસમાં વિશ્વભરમાં સૌથી વધુ કમાણી કરનારી ફિલ્મ બની હતી. આ ફિલ્મનું નિર્માણ આદિત્ય ચોપરાએ કહ્યું છે અને ફિલ્મનું નિર્દેશન સિદ્ધાર્થ આનંદ દ્વારા કરવામાં આવ્યું છે.
આગળ સિક્વલ્સ પણ આવશે
ફિલ્મ ‘ઝીરો’ ફ્લોપ થયા બાદ શાહરૂખ ખાન ચાર વર્ષ સુધી સ્ક્રીનથી દૂર રહયા હતા અને તેમણે ફિલ્મ ‘પઠાણ’થી કમબેક કર્યું છે. ફિલ્મમાં, તેમણે એક જાસૂસની ભૂમિકા ભજવી છે જે જીમની (જ્હોન અબ્રાહમ દ્વારા ભજવાયેલ) ખતરનાક યોજનાને તોડફોડ કરવાના મિશન પર છે. આ ફિલ્મ યશ રાજ ફિલ્મ્સના સ્પાય યુનિવર્સનો ભાગ છે. તેથી જ આ ફિલ્મની સિક્વલની જાહેરાત પણ ટૂંક સમયમાં થવાની આશા છે. જોકે શાહરૂખનું ‘પઠાણ’ નું પાત્ર સલમાન ખાનની ‘ટાઈગર 3’માં જોવા મળશે.
એક્શન સીનના વખાણ કર્યા
આ ફિલ્મની વાર્તામાં આવા ઘણા ટ્વિસ્ટ હતા જેને દર્શકોએ માણ્યા હતા. ફિલ્મના એક્શન સીન્સના ખૂબ વખાણ થયા હતા. ફિલ્મમાં આવા ઘણા દ્રશ્યો છે, જેને જોઈને દર્શકોએ તાળીઓ પાડી અને જોરદાર સીટીઓ વગાડી. હવે જોવાનું એ રહેશે કે આ ફિલ્મ જાપાનના દર્શકોને કેટલી પસંદ આવે છે.
