બોલિવૂડ અને તમિલ ફિલ્મ સ્ટાર આર.માધવનના પુત્ર વેદાંતે સ્વિમિંગમાં પોતાનું આગવું સ્થાન બનાવ્યું છે. આ વર્ષે વેદાંતે ખેલો યુથ ઇન્ડિયા ગેમ્સમાં ત્રણ ગોલ્ડ મેડલ જીત્યા હતા. વેદાંતે 100 મીટર, 200 મીટર અને 1500 મીટર ફ્રી સ્ટાઇલ ઇવેન્ટમાં આ સફળતા હાંસલ કરી હતી. વેદાંત તેના શાળાના દિવસોથી જ સ્વિમિંગ કરે છે અને તેમાંથી કારકિર્દી બનાવવા માંગે છે.
વેદાંતના પિતા આર માધવન પણ તેમની ઉપલબ્ધિને ખૂબ એન્જોય કરે છે અને સોશિયલ મીડિયા પર અવારનવાર વેદાંત સાથે સંબંધિત તસવીરો અને અપડેટ આપતા રહે છે. વેદાંતનો આવો જ એક વીડિયો સોશિયલ મીડિયા પર ઝડપથી ફેલાઈ રહ્યો છે. 17 વર્ષના વેદાંતની ટ્રેનિંગનો એક વીડિયો ખૂબ જ જોવામાં આવી રહ્યો છે, જેમાં તે રેતીથી ભરેલું ભારે જેકેટ પહેરીને રણમાં દોડી રહ્યો છે. આ વીડિયોમાં સ્પષ્ટપણે જોઈ શકાય છે કે તે તડકામાં ટ્રેનિંગને કારણે પરસેવાથી સંપૂર્ણપણે તરબોળ છે. આટલી નાની ઉંમરમાં સખત તાલીમ લઈ રહેલા વેદાંતનું સપનું છે કે એક દિવસ ભારત માટે ઓલિમ્પિકમાં ગોલ્ડ મેડલ જીતે.
પિતાથી અલગ ઓળખ બનાવવી
ઘણીવાર એવું જોવા મળે છે કે લગભગ દરેક સ્ટાર અભિનેતાના બાળકો બોલીવુડની માયાવી દુનિયા એટલે કે અભિનયમાં પોતાનું નસીબ અજમાવતા હોય છે. અમિતાભ બચ્ચનના પુત્ર અભિષેક, ધર્મેન્દ્રના પુત્ર સની-બોબી અને પુત્રી ઈશા સહિત આવા અનેક ઉદાહરણો છે. ઘણી વખત આ કારણોસર બોલિવૂડ અથવા ફિલ્મ જગત સાથે જોડાયેલા લોકો પર નેપોટિઝ્મનો આરોપ પણ લગાવવામાં આવતો હોય છે, પરંતુ વેદાંત માધવને પિતાથી કંઈક બીજું કરવાનો નિર્ણય લીધો છે. વેદાંત તેના પિતાની જેમ અભિનય નથી કરી રહ્યો, પરંતુ રમતગમતને તેનું ભાગ્ય બનાવી રહ્યો છે. ફિલ્મ ઈન્ડસ્ટ્રીથી દૂર રહીને તે વાસ્તવિક દુનિયામાં હીરો બનવા માંગે છે. અત્યાર સુધી તેને સફળતા પણ મળી છે.
