ઇઝરાયેલ- હમાસ યુદ્ધ હવે સમગ્ર ઇસ્લામિક જગત માટે મુદ્દો બની રહ્યું છે. આ મામલે, સઉદી અરબસ્તાન, જોર્ડન, લેબેનોન, સીરીયા અને ઈજીપ્ત જેવા દેશો, પહેલેથી જ ઇઝરાયેલને ગાઝા પર હુમલા રોકવા કહી રહ્યા છે. જ્યારે ઇરાને તો ખુલ્લી ધમકી આપી છે કે જો ગાઝા પર હુમલા બંધ નહીં થાય, તો દુનિયાભરના મુસલમાનો યુદ્ધમાં ઉતરશે અને ઇરાનના લશ્કરને દુનિયાની કોઇ તાકાત રોકી નહીં શકે. આ યુદ્ધ પછી આખી દુનિયાના મુસ્લિમો ઈઝરાયેલ વિરુદ્ધ એક થઈ રહ્યા છે. સાઉદી અરેબિયાએ ગાઝા પર સતત ઈઝરાયેલ હુમલાને લઈને OICની ઈમરજન્સી બેઠક બોલાવી છે. 57 ઈસ્લામિક દેશોના સંગઠન OICએ એક નિવેદન જારી કરીને કહ્યું છે કે આ બેઠક સાઉદી અરેબિયાની વિનંતી પર બોલાવવામાં આવી છે.
જેદ્દાહમાં યોજાનારી આ બેઠકમાં ગાઝામાં ઈઝરાયેલના સૈન્ય હુમલા પર ચર્ચા થશે. મધ્ય પૂર્વની સ્થિરતા અને સુરક્ષાને લઈને પણ ચર્ચા થશે. હકીકતમાં, હમાસના હુમલા પછી, ઇઝરાયેલે સમગ્ર ગાઝાને નષ્ટ કરીને બદલો લીધો છે. ઈઝરાયેલે ગયા શનિવારે ચેતવણી આપી હતી કે ગાઝાના લોકો 24 કલાકની અંદર આ વિસ્તાર છોડીને બીજે ક્યાંક ચાલ્યા જાય. OICએ તેની નિંદા કરી હતી.
OICએ આ યુદ્ધ માટે ઈઝરાયેલને જવાબદાર ગણાવ્યું છે. 57 ઈસ્લામિક દેશોના આ સંગઠને કહ્યું હતું કે ઈઝરાયેલે તરત જ પેલેસ્ટાઈનના લોકો પર હુમલા બંધ કરવા જોઈએ. આંતરરાષ્ટ્રીય સમુદાયે આમાં હસ્તક્ષેપ કરવો જોઈએ. હમાસના હુમલા બાદ ઈઝરાયેલ સંપૂર્ણ રીતે પરેશાન છે. ગાઝામાં ઈઝરાયેલની સેના કેમ્પ કરી રહી છે. પીએમ નેતન્યાહુએ કહ્યું કે હમાસે યુદ્ધ શરૂ કર્યું પરંતુ અમે તેને ખતમ કરીશું.
ઈરાનના સર્વોચ્ચ નેતા આયાતુલ્લા અલી ખમેનીએ ઈઝરાયેલને ચેતવણી આપી છે. તેમણે કહ્યું છે કે જો ઈઝરાયેલ ગાઝા પર આ રીતે હુમલો ચાલુ રાખશે તો દુનિયાના મુસ્લિમોને કોઈ રોકી શકશે નહીં.
