ગૌતમ સિંઘાનિયા મને અને મારી દીકરીને ઢોરમાર મારે છે : રેમન્ડના માલિક પર પત્નીના ગંભીર આરોપ

રેમન્ડના ચેરમેન ગૌતમ સિંઘાનિયાના પત્ની નવાઝ મોદીએ છૂટાછેડા માટે તેમની સંપત્તિનો 75 ટકા હિસ્સો માંગ્યો છે, તેણે ખુલાસો કર્યો છે કે ગૌતમ સિંઘાનિયાએ તેમને શારીરિક રીતે હેરાન કર્યા હતા, પરંતુ અંબાણીએ તેમને બચાવ્યા હતા. નવાઝ મોદીએ કહ્યું કે સિંઘાનિયાએ 10 સપ્ટેમ્બરની સવારે મુંબઈમાં તેમના નિવાસસ્થાને જન્મદિવસની પાર્ટી પછી તેમના પર અને તેમની સગીર પુત્રી નિહારિકા પર હુમલો કર્યો. એક રૂમમાં આશ્રય લઈને તેણે અને તેની પુત્રીએ પોલીસની મદદ લેવાનો પ્રયાસ કર્યો.
એક ઈન્ટરવ્યુમાં આ ઘટનાનું વર્ણન કરતા નવાઝ મોદીએ ખુલાસો કર્યો કે નીતા અને અનંત અંબાણીએ તેમને બચાવ્યા હતા. તેમણે કહ્યું, “મેં મારી ફ્રેન્ડ અનન્યા ગોએન્કાને ફોન કર્યો. તેણે વિચાર્યું કે પોલીસ અમારી મદદ કરવા આવવાની નથી.” આ સિવાય નિહારિકાએ તેના મિત્ર ત્રિશકર બજાજના પુત્ર વિશ્વરૂપને પણ ફોન કર્યો, જે સિંઘાનિયાના પિતરાઈ ભાઈ છે.
નવાઝ મોદીએ કહ્યું, “ત્રિશકરનો પુત્ર વિશ્વરૂપ પણ પાર્ટીમાં હતો. તે મારી દીકરીઓનો સારો મિત્ર છે. તેઓ એક જ ઉંમરના છે. તેથી તેમણે તેને બોલાવ્યો. નિહારિકાએ વિશ્વરૂપને એમ પણ કહ્યું કે તે ત્રિશકર બજાજને પણ આ અંગે જાણ કરે અને તેમને ગૌતમ સાથે વાત કરવા માટે સાથે લઈને આવે. ” નવાઝ મોદીએ કહ્યું, ”નીતા અંબાણી અને અનંત અંબાણી પણ મારી સાથે લાઇનમાં હતા. આખો પરિવાર મને બચાવવા કૂદી પડ્યો.
તેણે વધુમાં ઉમેર્યું, “આ માટે ભગવાનનો આભાર કારણ કે ગૌતમ નિહારિકાને કહેતો હતો કે પોલીસ તને મદદ નહીં કરે. બધા મારા ખિસ્સામાં છે. તેથી, નિહારિકા વધુ પરેશાન થઈ ગઈ.
દરમિયાન ગૌતમ સિંઘાનિયાએ નવાઝ મોદી દ્વારા લગાવવામાં આવેલા આરોપો પર ટિપ્પણી કરવાનો ઇનકાર કર્યો હતો. તેણે કહ્યું, “મારી બે સુંદર પુત્રીઓના હિતમાં, હું મારા પરિવારની ગરિમા જાળવવા માંગુ છું. હું કોઈપણ પ્રકારની ટિપ્પણી કરવાથી બચીશ. કૃપા કરીને મારી ગોપનીયતાનું સન્માન કરો.”
ગૌતમ સિંઘાનિયાએ 14 નવેમ્બરે તેમના પત્ની નવાઝ મોદીથી અલગ થવાની જાહેરાત કરી અને તેમના 32 વર્ષના લગ્નજીવનનો અંત કર્યો. ત્યારબાદ નવાઝે આરોપ લગાવ્યો કે તેને તેના પતિની દિવાળી પાર્ટીમાં જવાથી રોકવામાં આવી હતી. છૂટાછેડાના સમાધાનના ભાગરૂપે, નવાઝે તેની અંદાજિત નેટવર્થ $1.4 બિલિયનના 75 ટકા માંગ્યા.