અમેરિકામાં હિંદુઓના હિતોની રક્ષા કરવા હિંદુ કોકસની રચના

અમેરિકામાં ભારતીય સમુદાયનું વર્ચસ્વ સતત વધી રહ્યું છે. આવી સ્થિતિમાં હિંદુઓના હિતોની રક્ષા કરવા અને સંસદમાં તેમને સંબંધિત મુદ્દા ઉઠાવવા માટે એક નવી કોંગ્રેસ હિંદુ કોકસની રચના કરવામાં આવી છે. રિપબ્લિકન સાંસદો પીટર સેશન્સ અને એલિસ સ્ટેફનિકે યુએસ સંસદમાં આની જાહેરાત કરી હતી. આ હિંદુ કોકસનો ઉદ્દેશ્ય અમેરિકામાં હિંદુઓ સામે નફરત અને ભેદભાવને ખતમ કરવાનો પણ છે. 115મી કોંગ્રેસ દરમિયાન સ્થપાયેલ આ નવા હિંદુ કોકસે હિંદુ અમેરિકન સમુદાય અને નીતિ નિર્માતાઓ વચ્ચેના સંબંધોને ગાઢ બનાવવામાં મહત્વની ભૂમિકા ભજવી છે.
પીટરે કહ્યું કે આ નવા કોંગ્રેસનલ હિંદુ કોકસના અસ્તિત્વમાં આવવાથી હિંદુ અમેરિકન સમુદાયનો અવાજ સંસદમાં વધુ બુલંદ બન્યો છે. અમે આ સમુદાયને લગતા પ્રશ્નોને સંસદમાં મૂકવા, તેમની સમસ્યાઓનું નિરાકરણ લાવવા અને તેમના યોગદાનને મહત્વ આપવા માટે પ્રતિબદ્ધ છીએ.
હાલમાં જે કોક્સની રચના કરવામાં આવી છે: તેમાં ભારત, નેપાળ, શ્રીલંકા, ઈન્ડોનેશિયા, બાંગ્લાદેશ, ભૂતાન, પાકિસ્તાન, અફઘાનિસ્તાન, બ્રિટન અને નેધરલેન્ડના હિન્દુઓ પણ ભાગ લેશે. ભારતીય મૂળના અન્ય ધર્મો, શીખ, જૈન અને બૌદ્ધના પ્રતિનિધિઓને પણ આ કોકસમાં સામેલ કરવામાં આવશે.