સંસદની સુરક્ષામાં ચૂક મામલે ધરપકડ પાંચ આરોપીઓનો ‘પૉલીગ્રાફ’ અને ‘નાર્કો’ ટેસ્ટ કરવામાં આવ્યો હતો. જે બાદ પોલીસના એક સૂત્રએ દાવો કર્યો કે મનોરંજન ડી આ ઘટનાનો ષડયંત્રકાર છે. આ પહેલા પોલીસે કહ્યું હતું કે 13 ડિસેમ્બરની ઘટનાનો ષડયંત્રકાર લલિત ઝા હતો. પોલીસ અધિકારીઓએ જણાવ્યું કે તમામ છ આરોપીઓ- સાગર શર્મા, મનોરંજન ડી, અમોલ શિંદે, નીલમ આઝાદ, લલિત ઝા અને મહેશ કુમાવતને શનિવારે પટિયાલા હાઉસ કોર્ટમાં રજૂ કરવામાં આવ્યા હતા. કોર્ટે તમામને જ્યુડિશિયલ કસ્ટડીમાં મોકલી દીધા છે.
પોલીસ સુત્રો અનુસાર, નીલમને છોડીને બાકી પાંચ આરોપીઓને આઠ ડિસેમ્બરે ‘પૉલીગ્રાફ’ તપાસ માટે ગાંધીનગર લાવવામાં આવ્યા હતા. નીલમે કોર્ટ સામે ‘પૉલીગ્રાફ’ ટેસ્ટ કરાવવાની સહમતિ આપી નહતી. સૂત્રોએ જણાવ્યું કે સાગર અને મનોરંજનનું નાર્કો ટેસ્ટ અને ‘બ્રેન મેપિંગ ટેસ્ટ’ થયો હતો. સૂત્રો અનુસાર અત્યાર સુધીની તપાસ અને પૂછપરછમાં ખબર પડી છે કે આરોપીઓએ સરકારને એક મેસેજ આપવાની યોજના બનાવી હતી. સૂત્રોએ જણાવ્યું કે આરોપીઓએ ખુલાસો કર્યો કે તે બેરોજગારી, મણિપુર સંકટ અને ખેડૂત આંદોલનના મુદ્દાથી પરેશાન હતા.
મહત્ત્વપૂર્ણ છે કે સંસદ પર 2001માં થયેલા આતંકી હુમલાની વર્ષીના દિવસે 13 ડિસેમ્બર 2023એ સાગર શર્મા અને મનોરંજન ડી લોકસભામાં ઝીરો અવર્સ દરમિયાન પ્રેક્ષક ગેલેરીમાંથી સદનમાં કુદી ગયા હતા. આ સાથે જ બન્ને આરોપીઓએ નારા લગાવતા એક કેનથી પીળો ધુમાડો છોડ્યો હતો. કેટલાક સાંસદોએ બન્નેને પકડી લીધા હતા અને સુરક્ષા કર્મીઓના હવાલે કર્યા હતા. આ જ સમયે અમોલ શિંદે અને નીલમ આઝાદે સંસદ ભવન પરિસરની બહાર ‘તાનાશાહી નહીં ચલેગી’ના નારા લગાવતા કેનથી રંગીન ધુમાડો ફેલાવ્યો હતો.
