બદલો : ઇઝરાયેલે દક્ષિણ લેબનોનમાં કર્યા હવાઈ હુમલા

ઈરાનના ઈઝરાયેલ પર હુમલા બાદ મધ્ય પૂર્વમાં સ્થિતિ ઝડપથી બદલાઈ રહી છે. ઈઝરાયેલે કહ્યું છે કે તે ઈરાનના હુમલાનો જવાબ આપશે. દરમિયાન, ઇઝરાયેલી સેનાનું કહેવું છે કે દક્ષિણ લેબેનોનમાં હવાઈ હુમલામાં બે હિઝબુલ્લાહ કમાન્ડર સહિત ત્રણ લડવૈયાઓ માર્યા ગયા છે. ઈઝરાયેલની સેનાએ કહ્યું છે કે રાડવાન ફોર્સના પશ્ચિમી સેક્ટરના રોકેટ અને મિસાઈલ યુનિટના કમાન્ડર મોહમ્મદ હુસૈન શાહહૌરી હવાઈ હુમલામાં માર્યા ગયા છે.
ઈઝરાયેલ ડિફેન્સ ફોર્સ દ્વારા જારી કરવામાં આવેલા એક નિવેદનમાં કહેવામાં આવ્યું છે કે મોહમ્મદ હુસૈન શાહહૌરીએ લેબનોનના મધ્ય અને પશ્ચિમી વિસ્તારોમાંથી ઈઝરાયેલના વિસ્તારો તરફ રોકેટ અને મિસાઈલ હુમલાની યોજના બનાવી હતી. હિઝબુલ્લાહના રોકેટ અને મિસાઇલ યુનિટના અન્ય કમાન્ડર, મહમૂદ ઇબ્રાહિમ ફદલ્લાહ પણ હવાઈ હુમલામાં માર્યા ગયા હતા.
અગાઉ, ઇઝરાયેલી સંરક્ષણ દળે એક નિવેદનમાં જણાવ્યું હતું કે દક્ષિણ લેબનોનમાં તેના હવાઈ હુમલામાં લેબનોનના આઈન અબેલ વિસ્તારમાં હિઝબુલ્લાહના દરિયાકાંઠાના વિસ્તારના કમાન્ડર ઈસ્માઈલ યુસેફ બાઝનું મોત થયું હતું. હિઝબુલ્લાએ પણ તેના ત્રણ લડવૈયાઓના મોતની પુષ્ટિ કરી છે. જો કે, હિઝબુલ્લાહ તરફથી આ વિશે વધુ કંઈ કહેવામાં આવ્યું નથી.