સાઉથ આફ્રિકાએ સેમિફાઈનલમાં અફઘાનિસ્તાનને હરાવીને T20 વર્લ્ડ કપ 2024માં પહોંચનારી ટીમ બની ગઈ છે. આ જીત સાથે, સાઉથ આફ્રિકાએ પહેલીવાર વર્લ્ડ કપની ફાઈનલમાં પ્રવેશ કર્યો અને ટીમ પરના ચોકર્સનો ટેગ કાઢી નાખ્યો છે. સાઉથ આફ્રિકાની ટીમ 5 વખત ODI વર્લ્ડ કપ અને 2 વખત T20 વર્લ્ડ કપની સેમિફાઈનલમાંથી બહાર રહી છે.
ત્રિનિદાદ અને ટોબેગોના બ્રાયન લારા સ્ટેડિયમમાં અફઘાનિસ્તાને ટૉસ જીતીને પ્રથમ બેટિંગ કરવાનો નિર્ણય કર્યો હતો. ટીમ માત્ર 11.5 ઓવરમાં 56 રનમાં સમેટાઈ ગઈ હતી. જવાબમાં સાઉથ આફ્રિકાએ 8.5 ઓવરમાં 1 વિકેટ ગુમાવીને ટાર્ગેટ ચેઝ કરી લીધો હતો. T-20 ઈન્ટરનેશનલમાં અફઘાનિસ્તાનનો સૌથી લોએસ્ટ ટીમ ટોટલ છે. આ ટીમનો અગાઉનો સૌથી ઓછો સ્કોર 72 રન હતો, જે 2014 T20 વર્લ્ડ કપમાં બાંગ્લાદેશ સામે બન્યો હતો.
અફઘાનિસ્તાન તરફથી કોઈ બેટર મોટી ઇનિંગ રમી શક્યો નહોતો. અઝમતુલ્લા ઓમરઝાઈએ સૌથી વધુ 10 રન બનાવ્યા હતા. તેના સિવાય એક પણ ખેલાડી ડબલ ફિગર પણ પાર કરી શક્યો નથી. સાઉથ આફ્રિકાના માર્કો યાન્સેન અને તબરેઝ શમ્સીએ 3-3 વિકેટ લીધી હતી. કાગીસો રબાડા અને એનરિક નોર્કિયાએ 2-2 વિકેટ લીધી હતી.
ફાઈનલમાં ભારત કે ઇંગ્લેન્ડ? નિર્ણય રાત્રે
ફાઈનલમાં પહોંચનારી બીજી ટીમનો નિર્ણય રાત્રે આવશે. ગયાનાના પ્રોવિડન્સ સ્ટેડિયમમાં ભારત અને ઇંગ્લેન્ડની ટીમ સામસામે ટકરાશે. મેચ થવાની શક્યતાઓ પણ વધી ગઈ છે, કારણ કે વરસાદની શક્યતા ઘટીને 40% થઈ ગઈ છે. વરસાદ પડશે તો વધુ એક્સ્ટ્રા 4 કલાક આપશે. આ પછી પણ જો હવામાન અને પિચ રમવા માટે યોગ્ય ન હોય તો મેચ રદ થઈ શકે છે. સેમિફાઈનલ માટે કોઈ રિઝર્વ ડે રાખવામાં આવ્યો નથી. આવી સ્થિતિમાં, જો મેચ રદ થાય છે, તો ભારત, સુપર-8માં ગ્રૂપ-1ની ટેબલ ટોપર છે, તો ફાઈનલમાં પહોંચી જશે.
