પોલીસની ભૂમિકા અને સંખ્યાને લઇને હાઈકોર્ટમાં અગાઉ સુઓમોટો પિટિશન દાખલ કરાઈ હતી. આ પિટિશન સુપ્રીમ કોર્ટના 2019ના નિર્દેશો પ્રમાણે લેવામાં આવી હતી. જેમાં પોલીસ રિડ્રેસલ ફોર્મની સ્થાપના કરવી, પોલીસ બેડામાં ખાલી જગ્યા ભરવી, પોલીસને ટ્રેનિંગ આપવી, વસ્તી પ્રમાણે પોલીસની ભરતી કરવી પોલીસના કામના કલાકો નક્કી કરવા, તોફાનો વખતે જાહેર મિકલતોને નુકસાન થતું અટકાવવું, સરઘસોની ફોટોગ્રાફી અને વીડિયોગ્રાફી કરવી, સુપ્રીમ કોર્ટ દ્વારા અપાયેલા નિર્દેશોનું પાલન કરવું, સભા માટે પોલીસ પરવાનગી અનિવાર્ય બનાવવી જેવી બાબતોનો સમાવેશ થાય છે.
આ મુદ્દે ગુજરાત હાઈકોર્ટમાં ચીફ જજ સુનિતા અગરવાલ અને જજ પ્રણવ ત્રિવેદીની બેંચ સમક્ષ સુનાવણી ચાલી રહી છે. જેમાં આજે રાજ્યમાં પોલીસ ભરતી મુદ્દે DGPનું એફિડેવિટ રજૂ કરવામાં આવ્યું હતું. કોર્ટને જણાવાયું હતું કે, છેલ્લા એક મહિનામાં 525 જગ્યા પ્રમોશનથી ભરવામાં આવી છે. સપ્ટેમ્બર 2026 સુધીમાં બેકલોગની તમામ પોલીસ ભરતી પૂર્ણ કરાશે. 5,248 પ્રમોશનની ભરતી પૈકી 525 ભરાઈ 4,723 બાકી છે. કોર્ટે PI અને PSI ભરતી વિશે પૂછ્યું હતું. સાથે જ ઇન્ટેલિજન્સ ઓફિસરની 164 જગ્યાઓ ભરવાની બાકી હોવા અંગે પણ કોર્ટે પૂછ્યું હતું.
સરકારી વકીલે જણાવ્યું હતું કે, 31 માર્ચ 2025 સુધીમાં PI અને PSIની જગ્યાઓ પ્રમોશનથી ભરવામાં આવશે. વર્ષ 2025 અને બીજા વર્ષ 2026નું પોલીસ ભરતીનું કેલેન્ડર કોર્ટ સમક્ષ મૂકાયું હતું. કોર્ટને જણાવાયું હતું કે, ડિપાર્ટમેન્ટ પ્રમોશનલ કમિશન પ્રમોશનની ભરતી કરે છે. કોર્ટે એક સીધી ભરતી સાથે બીજી ભરતીની પ્રોસેસ કરવા સૂચન કર્યું હતું. જોકે, સરકારી વકીલે જણાવ્યું હતું કે, ઉનાળા અને ચોમાસામાં ફિઝિકલ ટેસ્ટ લેવામાં આવતી નથી. બોર્ડની પરીક્ષાઓ પૂર્ણ થતાં ઉમેદવારો અરજી કરે છે.
સરકારી વકીલે જણાવ્યું હતું કે, ચાર ફેઝમાં પોલીસ ભરતી કરવામાં આવશે. જેમાં પ્રથમ ફેઝમાં પ્રમોશન દ્વારા 3,834 ASI અને હેડ કોન્સ્ટેબલ, બીજા ફેઝમાં 31 માર્ચ 2025 સુધીમાં 1,414 PI અને PSIના પ્રમોશન થશે. ફેઝ ત્રણમાં સપ્ટેમ્બર 2025 સુધી બહાર પડાયેલી સીધી ભરતી પૂર્ણ કરવામાં આવશે. ફેઝ ચારમાં આગળની સીધી ભરતી કરાશે. ગુજરાતના 5 ટ્રેનિંગ સેન્ટરમાં એક સાથે 5 હજાર લોકોને ટ્રેનિંગ આપી શકાય છે. પ્રમોશનમાં પણ એક રેગ્યુલર અને એક પરીક્ષાથી થતું પ્રમોશન હોય છે. પહેલાં બેક લોગ પતે તો રેગ્યુલર ભરતી થાય. કોર્ટે પોલીસ ટ્રેનિંગ સંસ્થાની કેપેસિટી વધારવા સૂચન કર્યું હતું. આ મુદ્દે વધુ સુનાવણી 25 ઓકટોબરે હાથ ધરાશે.
