વડોદરામાં સ્કૂલ બાદ હવે હોટલને ધમકી મળતા વડોદરા પોલીસનાં ઉચ્ચ અધિકારીઓનો કાફલો ઘટના સ્થળે પહોંચી તપાસ હાથ ધરી હતી. વડોદરાનાં અલકાપુરી સ્થિત એક્સપ્રેસ હોટલને ધમકી ભર્યો ઈ-મેલ મળ્યો હતો. આ ઈ-મેઈલમાં રૂમ અને પાઈપ લાઈનમાં બોમ્બ હોવાનો પણ ઉલ્લેખ કરવામાં આવ્યો હતો.
26 મી જાન્યુઆરીને લઈ કોઈ અનિચ્છનીય બનાવ ન બને તે માટે પોલીસ દ્વારા ચુસ્ત પોલીસ બંદોબસ્ત ગોઠવવામાં આવ્યો હતો. ત્યારે ફરી વડોદરામાં અલકાપુરી સ્થિત એક્સપ્રેસ હોટલને ધમકી ભર્યો ઈ-મેલ મળતા હોટલ સ્ટાફ સહિત હોટલમાં રહેલ મુસાફરોમાં ફફડાટ ફેલાઈ જવા પામ્યો હતો. હોટલ સંચાલક દ્વારા આ ઈમેઈલને લઈ પોલીસને જાણ કરતા વડોદરા ક્રાઈમ બ્રાન્ચ, બોમ્બ સ્કોર્ડ, ડોગ સ્કોર્ડ સહિતની ટીમો હોટલ ખાતે પહોંચી હતી. તેમજ હોટલમાં રહેલ લોકોને સુરક્ષિત બહાર કાઢી તપાસ હાથ ધરી હતી. પરંતું તપાસનાં અંતે હોટલમાંથી કંઈ મળ્યું ન હતું.
