‘ચીન પર 125% નહીં, પણ 145% ટેરિફ’

અમેરિકાએ ચીન પર 125% નહીં પણ 145% ટેરિફ લાદ્યો છે. વ્હાઇટ હાઉસે આ સ્પષ્ટ કરી દીધું છે. ટ્રમ્પે 9 એપ્રિલે બુધવારે ચીન પર 125% ટેરિફ લાદવાની જાહેરાત કરી હતી. ત્યાર બાદ ગુરુવારે, વ્હાઇટ હાઉસે કહ્યું કે તે માર્ચ 2025થી ફેન્ટાનાઇલ પર 20% ટેરિફ ઉમેરી રહ્યું છે.ટ્રમ્પે 4 માર્ચે ફેન્ટાનાઇલ ડ્રગ હેરફેરમાં ચીનની કથિત ભૂમિકા બદલ તેના પર 20% ટેરિફ લાદ્યો હતો. અત્યાર સુધી તેની ગણતરી અલગથી કરવામાં આવતી હતી.
ચીન પર 145% ટેરિફ લાદવાનો સીધો અર્થ એ છે કે ચીનમાં બનેલી 100 ડોલરની પ્રોડક્ટ હવે અમેરિકા પહોંચશે ત્યારે તેની કિંમત 245 ડોલર થશે. અમેરિકામાં ચીની વસ્તુઓ મોંઘી થવાને કારણે તેનું વેચાણ ઘટશે. તમને જણાવી દઈએ કે ચીને પણ બદલામાં અમેરિકા પર 84%નો ટેરિફ લાદ્યો છે.યુએસ સરકારી બોન્ડ માર્કેટમાં ફરી વેચવાલી શરૂ થઈ. તે જ સમયે, શેરબજારના નાસ્ડેક કમ્પોઝિટ ઇન્ડેક્સમાં લગભગ 7%નો ઘટાડો થયો. આ સાથે એપલ, એનવીડિયા અને અન્ય કંપનીઓના શેર પણ ઘટ્યા. તેલના ભાવ લગભગ 4% ઘટ્યા, ક્રૂડ હવે $63 પ્રતિ બેરલની નીચે ટ્રેડ થઈ રહ્યું છે.
ટ્રમ્પે 1 ફેબ્રુઆરીએ ચીની ઉત્પાદનો પર 10% ટેરિફ લાદ્યો હતો, જે 3 માર્ચે વધારીને 20% કર્યો હતો. આ પછી 2 એપ્રિલે, તેને વધારીને 54% કરવામાં આવ્યો હતો. ત્યાર બાદ 9 એપ્રિલે તે વધીને 104% થઈ ગયું, જ્યારે 10 એપ્રિલે તે વધારીને 145% કરવામાં આવ્યું.ટ્રમ્પે ગઈકાલે કહ્યું હતું કે, 75થી વધુ દેશોએ અમેરિકી પ્રતિનિધિઓને બોલાવ્યા છે અને આ દેશોએ મારા મજબૂત સૂચન પર અમેરિકા સામે કોઈપણ રીતે બદલો લીધો નથી. તેથી મેં 90 દિવસનો વિરામ સ્વીકાર્યો છે. ટેરિફ પર આ વિરામ નવા વેપાર કરારો પર વાટાઘાટો માટે સમય આપશે.