આજે કડી અને વિસાવદર વિધાનસભા બેઠકો પર યોજાયેલી પેટાચૂંટણીનું પરિણામ જાહેર થશે, જે ગુજરાતના રાજકારણમાં એક નવો વળાંક લાવી શકે છે. આ બંને બેઠકો પર ત્રિપાંખિયો જંગ જોવા મળ્યો હતો, જેમાં ભાજપ, આમ આદમી પાર્ટી (AAP) અને કોંગ્રેસના ઉમેદવારો વચ્ચે કાંટે કી ટક્કર જોવા મળી હતી. કડીમાં 57.90 ટકા અને વિસાવદરમાં 56.89 ટકા મતદાન થયું હતું. મહેસાણામાં GTU-ITR, મેવડ ખાતે કડી વિધાનસભા પેટા ચૂંટણી અને જૂનગાઢમાં કૃષિ યુનિવર્સિટી ખાતે વિસાવદર વિધાનસભા પેટા ચૂંટણીની મત ગણતરી શરૂ થઇ ગઈ હતી.
ગુજરાત વિધાનસભાની કડી તથા વિસાવદર બેઠકની પેટા ચૂંટણી યોજાઈ હતી જેમાં ભારે ઉત્સાહભેર મતદાન થયું હતું બંને બેઠકો ઉપર ભાજપ, કોંગ્રેસ અને આપના ઉમેદવારો વચ્ચે ત્રિપાંખિયો જંગ થઇ રહ્યો છે આજે સોમવારે સવારથી ચુસ્ત બંદોબસ્ત વચ્ચે બંને બેઠકો માટે મત ગણતરીનો પ્રારંભ થયો હતો જેમાં પ્રથમ પોસ્ટલ બેલેટની ગણતરી કરાયા બાદ ઈવીએમની ગણતરી કરવામાં આવી હતી જેમાં વિસાવદર બેઠકમાં આમ આદમી પાર્ટીના ગોપાલ ઈટાલીયા અને ભાજપના કિરીટ પટેલ વચ્ચે ભારે મુકાબલો થઇ રહ્યો છે અને પ્રથમ સાત રાઉન્ડમાં ભાજપના ઉમેદવાર માત્ર એક હજાર મતની સરસાઈથી આગળ ચાલી રહ્યા હતા ત્યારબાદ આપના ઉમેદવાર ગોપાલ ઇટાલીયાની સરસાઈ શરુ થઇ હતી અને ભાજપના ઉમેદવાર કિરીટ પટેલની લીડ કાપીને 20 રાઉન્ડ સુધીમાં ગોપાલ ઇટાલિયાએ 15000 જેટલા મતોની સરસાઈ મેળવી લીધી હતી આપના ઉમેદવારની સરસાઈ વધતા આગેવાનો અને કાર્યકરોમાં ઉત્સાહ ફેલાયો હતો. અને વિજયની તૈયારીઓ પણ કરવા લાગ્યા હતા.
આ ઉપરાંત કડી વિધાનસભા બેઠક પર પ્રથમ રાઉન્ડથીજ ભાજપના રાજેન્દ્ર કુમાર ચાવડા તેમના પ્રતિ દ્વંદી કોંગ્રેસના ઉમેદવાર કરતા આગળ ચાલી રહ્યા હતા અને 20 રાઉન્ડ સુધીમાં 38 હજારથી વધુ મતની સરસાઈ મેળવી ચુક્યા છે. આથી કડી બેઠક પર ભાજપના કાર્યકરો વિજય નિશ્ચિત માની રહ્યા છે. અને જીતની ઉજવણીની શરૂઆત પણ કરી દીધી છે. આમ અત્યારના સંજોગો પ્રમાણે 1 બેઠક ભાજપ અને 1 આપને ફાળે જાય તેવી શક્યતા ચાલી રહી છે જયારે કોંગ્રેસને બંને બેઠકોમાં હારનો સામનો કરવો પડી શકે છે.
