એશિયા કપમાં મેચ બાદ સ્ટેડિયમમાં જ મારામારી

એશિયા કપમાં સિઝન હવે ખૂબ જ રોમાંચક મોડ પર પહોંચી ગઈ છે, ટીમ ઈન્ડિયા અને અફઘાનિસ્તાન બહાર થઈ ગયા છે જ્યારે પાકિસ્તાન અને શ્રીલંકા હવે ફાઇનલમાં છે. જો કે ગઇકાલે ક્રિકેટની દુનિયામાં ગઇકાલે એક શરમજનક હરકત જોવા મળી છે. અફઘાનિસ્તાનને હરાવ્યા બાદ પાકિસ્તાની ખેલાડીઓની સાથે તેમના દર્શકો પણ વધુ પડતાં જોશમાં આવી ગયા હતા જે બાદ અફરાતફરી અને મારામારી થઈ હતી.
છેલ્લી ઓવર સુધી મેચ ચાલી અને તે બાદ પાકિસ્તાન બે સિક્સરની મદદથી ફાઇનલમાં પહોંચી ગયું હતું જે બાદ સ્ટેડિયમમાંથી જ મેચ જોવા આવેલા લોકોએ એકબીજા પર હુમલા શરૂ કરી દીધા હતા. પરિસ્થિતિ એવી બગડી કે સ્ટેડિયમની ખુરશીઓ ઉખાડીને ફેંકી ફેંકીને એક બીજાને મારવામાં આવી.
અફઘાનિસ્તાનની ટીમે ટોસ જીતીને પહેલા બેટિંગ કરી અને 126 રન બનાવ્યા હતા જે બાદ 127 રન બનાવવામાં પાકિસ્તાનની ટીમને ફીણ આવી ગયા. 118 રન પર 9 વિકેટ પડી ગઈ હતી, જોકે છેલ્લી ઓવરમાં નસિમ શાહે સતત બે સિક્સ મારીને મેચ જિતાડી હતી.